Petropavl kóshelerine qıyrshyq tas tóseýge bólingen 5 mlrd teńge jelge ushty

PETROPAVL. QazAqparat – Soltústik Qazaqstan oblysynyń sybaılas jemqorlyqqa qarsy qyzmeti Petropavl kóshelerine qıyrshyq tas tóseýde qyrýar qarajattyń tıimsiz paıdalanylǵanyn anyqtady, dep habarlaıdy QazAqparat tilshisi.

SQO sybaılas jemqorlyqqa qarsy qyzmettiń basshysy Sergeı Perovtyń aıtýynsha, bıyl Petropavl qalalyq ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimine jemqorlyq táýekelderine syrtqy taldaý jumystaryn aıaqtady.

Nátıjesinde sońǵy úsh jylda qala kóshelerine qıyrshyq tas tóseýde ǵana 5 mlrd teńge bıýdjettik qarajattyń tıimsiz jumsalǵanyn anyqtalǵan.

«Qıyrshyq tasty tósegennen keıin naqty oryndalǵan jumysty aıqyndaý boıynsha ádisnamanyń joqtyǵy jáne saraptama júrgizýdiń múmkin emestigin bilgendikten, qala kóshelerine qıyrshyq tas tóseý jumystaryna jobalyq-smetalyq qujattar jasalmaǵan. Al smetalyq esepteýlerde kóterińki baǵa qoldanylǵan. Taldaý qorytyndysy boıynsha, oblys basshylyǵymen birlesip Petropavldaǵy barlyq greıderlik kóshelerdi asfalttaý týraly usynymdar ázirlendi, bul sybaılas jemqorlyq jymqyrý shemalaryn tolyǵymen joıady. Osylaısha, qarajattyń jumsalýyn sapaly baqylaýǵa jáne qalanyń barlyq joldarynyń tehnıkalyq jaı-kúıin arttyrýǵa bolady», - deıdi Sergeı Perov.

Búginde osy usynymdy iske asyrý maqsatynda oblys ortalyǵynyń 17 kóshesin asfalttaý úshin bıýdjetten 4 mlrd teńge bólindi.

Ashyq kózderden alynǵan foto