Petropavl kóshelerindegi baqylaý júıesi bıyl 1200-den astam zańsyzdyqty tirkedi
PETROPAVL. QazAqparat – Petropavldaǵy kóshe qıylystarynda turǵan avtomatty tehnıkalyq ólsheý quraldary jyl bastalǵaly 1251 quqyqbuzýshylyqty tirkedi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oblys ortalyǵyndaǵy birneshe kóshe qıylysynda ıntellektýaldy baqylaý júıesi jumys isteıtindigi jaıynda turǵyndar birneshe márte eskertildi. Soǵan qaramastan tehnıkalyq qurylǵynyń obektıvine bir aıdyń ishinde birneshe ret túskender bar. Astanalyq 42 jastaǵy turǵyn qıylysty durys ótpegeni úshin úsh ret aıyppul tóledi. Ol Abaı-Nazarbaev kósheleriniń qıylysynda 10 mınýttyń ishinde eki ret zańsyzdyqqa jol bergen. Sheteldik tirkeýi bar kóliktiń júrgizýshisi kósheniń osy qıylysynda bir aıda eki ret beınekameraǵa túsken.
Mamandardyń aıtýynsha, ótken jyldyń sońynan bastap baqylaý júıesi jol erejesin buzǵan osyndaı kólikterdi de tirkeıtin bolǵan. Nátıjesinde sheteldik tirkeýi bar kólik júrgizýshileri bıyl 74 ret aıyppul tólegen.
«Jol belgilerin nazarǵa almaı, talaptardy oryndamaǵan jaǵdaıda 3 AEK deıin aıyppul salynady. Eger júrgizýshi bir jyldyń ishinde ony qaıtalaıtyn bolsa, onda 10 AEK mólsherinde aıyppul tóleıdi. Sondaı-aq aıyppul bir aptanyń ishinde tólenetin bolsa, onyń somasy 50% deıin qysqarady», - deıdi SQO PD Ákimshilik polıtsııa basqarmasynyń bastyǵy Jasulan Ospanov.
Petropavl qalasyndaǵy kóshe qıylystarynyń tórteýine ıntellektýaldy baqylaý júıesi ornatylǵan.
