Petropavl-Kókshetaý jolynda bes kólik soqtyǵysyp, úsh adam kóz jumdy
PETROPAVL. KAZINFORM — Jol-kólik oqıǵasy búgin saǵat tańǵy 8.00 shamasynda respýblıkalyq mańyzy bar Petropavl — Kókshetaý avtojolynyń Kremenchýg aýyly mańynda boldy.
Soltústik Qazaqstan oblystyq polıtsııa departamenti baspasóz qyzmetiniń málimetinshe, jolda úsh jeńil avtokólik pen eki KamAZ soqtyǵysty.
Saldarynan Audi jeńil avtokóliginiń úsh jolaýshysy alǵan jaraqattarynan oqıǵa ornynda kóz jumdy. Osy kóliktiń júrgizýshisi men taǵy bir jolaýshysy medıtsınalyq mekemege jetkizildi. Qalǵan kólikterdiń júrgizýshileri zardap shekken joq.
— Qazirgi ýaqytta polıtsııa abaısyzda eki nemese odan kóp adamnyń ólimine ákep soqqan jol qozǵalysy erejelerin buzý deregi boıynsha sotqa deıingi tergeýdi bastady. Oqıǵanyń barlyq sebebi men mán-jaıyn tolyq tekserý úshin qajetti saraptamalar taǵaıyndaldy, — delingen resmı jaýapta.
SQO Densaýlyq saqtaý basqarmasynyń málimetinshe, jol-kólik oqıǵasynda zardap shekken kólik júrgizýshisi men jolaýshy Taıynsha kópbeıindi aýdanaralyq aýrýhanasyna jatqyzyldy. Dárigerler áıeldiń jaǵdaıyn aýyr dep baǵalady.
Audi kóliginde Jambyl aýdany Presnovka eldi mekenindegi balabaqshanyń qyzmetkerleri jáne rýlde solardyń biriniń balasy bolǵan. SQO bilim basqarmasy Taıynsha aýdanynda bolǵan jol-kólik oqıǵasy saldarynan qaza tapqandardyń týǵan-týystary men jaqyndaryna qaıǵyra kóńil aıtty.
- Jol apatynda Jambyl aýdanynyń bilim berý salasynyń qyzmetkerleri - balabaqsha dırektory men eki tárbıeshi qaza tapty. Qolda bar aqparatqa sáıkes, sapar jeke sıpatta bolǵan jáne qyzmettik mindetterin oryndaýmen baılanysty bolǵan joq, - delingen basqarmanyń habarlamasynda.
Buǵan deıin Almaty oblysynda jol erejesin óreskel buzyp, kortej uıymdastyrǵan tórtinshi júrgizýshi jaýapkershilikke tartylǵanyn jazǵan edik.
