Petropavl qysta jylýsyz qalmaýy úshin ne isteldi
ASTANA. KAZINFORM — Petropavl JEO-2 tórt qazandyq pen bir týrboagregatqa kúrdeli jóndeý júrgizildi, dep habarlaıdy Energetıka mınıstrliginiń baspasóz qyzmeti.
Energetıka mınıstrligi jylytý maýsymynyń ótýine, jóndeý jumystarynyń ýaqtyly júrgizilýine jáne energetıkalyq ınfraqurylymdy júıeli jańǵyrtýǵa erekshe nazar aýdaryp keledi.
Bıyl elimizdiń elektr stantsııalarynda 9 energııa blogyn, 55 qazandyq pen 51 týrbınany kúrdeli jóndeýden ótkizý josparlanǵan.
— «SEVKAZENERGO» AQ-nyń Petropavl JEO-2 stantsııasynda qysqy júkteme kezeńinde qalany jylýmen jáne elektr energııasymen senimdi qamtamasyz etýge baǵyttalǵan jazǵy jóndeý naýqanynyń negizgi kezeńi aıaqtaldy. Stantsııada tórt qazandyq pen bir týrboagregatqa kúrdeli jóndeý júrgizildi. Jaqyn ýaqytta taǵy bir qazandyq agregatyn kúrdeli jóndeý aıaqtalady dep josparlanýda. Osylaısha, jylytý maýsymynyń basynda 10 qazandyq agregaty men 7 týrboagregat jumys istep tur. Bul elimizdiń soltústik óńirlerine tán tómen temperatýra jaǵdaıynda jylý jáne elektr energııasyn turaqty óndirýge múmkindik beredi, — deıdi mamandar.
Sonymen qatar stantsııada tutynýshylarǵa energııa berýge áser etpeıtin josparly jóndeý jumystary jalǵasady. JEO-2 jabdyqtaryn jańǵyrtý aldaǵy jyldary da jalǵasady. 2028 jyly № 4 qazandyq agregatyn rekonstrýktsııalaý bastalady dep josparlanǵan. Osy kezeńde № 2 qazandyq agregatynyń ónimdiligi saǵatyna 220 tonnadan 240 tonnaǵa deıin ulǵaıtylyp, paıdalanýǵa beriledi. Al 2029 jyldan bastap № 3 týrboagregatty rekonstrýktsııalaý kózdelip otyr.
Stantsııany jańartýdyń mańyzdy baǵyttarynyń biri — tútin murjalaryn jańǵyrtý. 2024 jyly № 1 jańa tútin murjasynyń qurylysy aıaqtalyp, ol paıdalanýǵa berildi jáne qajetti tehnologııalyq júktemeni qamtamasyz etip otyr.
Qazirgi ýaqytta № 3 tútin murjasyn rekonstrýktsııalaý jumystary júrgizilip jatyr. Ony 2026–2027 jyldardaǵy jylytý maýsymynda aralyq kezeńde paıdalanýǵa berý josparlanǵan.
Buǵan deıin Petropavlda 5,4 shaqyrym jylý jelisi jańartylǵanyn jazǵanbyz.
