Petropavl kásipkerleri maqtaaraldyqtarǵa turmysqa qajetti zattardy jetkizip berdi
Osy aptada Soltústik Qazaqstan oblysynyń «BAYDALA» jaýapkershiligi shekteýli seriktestigi tasqynnan zardap shekkenderge 100 elektr sháınegi men 100 útikti tartý etti.
Qaıyrymdylyq júk kóligin bastap kelgen azamat A. Satekbaev «BAYDALA» JShS dırektory D.Shalabaevtyń amanatyn ala kelip, tótenshe jaǵdaıdan zardap shekken jandarǵa qol ushyn sozý - ózderi úshin úlken mindet ekenin atap ótti.
«Maqtaaral aýdanynyń kásipkerlik bóliminiń basshysy Óser Myrzamdamov aǵamyzǵa habarlasyp, turǵyndarǵa asa qajetti zattardy bildik. Ol kisi azyq-túlik pen gıgıenalyq zattar qory jetkilikti ekenin aıtyp, óz usynysyn berdi. Mine, 1 mıllıon teńgeden asa qarjyǵa 100 elektr sháınegi men 100 útikti satyp alyp, qoımaǵa tabystap otyrmyz», - deıdi qaıyrymdylyq is-sharasyn uıymdastyrýǵa jaýapty Azamat Satekbaev.
Aıta keteıik, Maqtaaral aýdanyna jetkizilip jatqan gýmanıtarlyq kómektiń legi áli toqtaǵan joq.
Aýdan ortalyǵyndaǵy qoımaǵa osy ýaqytqa deıin 742 tonnadan astam azyq-túlik pen taýar jınalyp, onyń 363 tonnadan astamy taratylǵan.
