Petropavl qalasynyń turǵyndary óz ýchaskelik ınspektorlaryna tegin telefon shala alady
PETROPAVL. QazAqparat – Petropavl qalasynda turǵyndar endi úı telefonynan da ýchaskelik ınspektorynyń uıaly telefonyna tegin habarlasa alady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, bul - Petropavl qalalyq polıtsııa basqarmasy men «Qazaqtelekom» AQ birlesken jobasy aıasynda múmkin bolyp otyr. Tártip saqshysyna habarlasý úshin onyń uıaly telefon nómiriniń sońǵy alty tsıfryn bilse bolǵany.
«Ýchaske» jedel-aldyn alý is-sharasy aıasynda ýchaskelik ınspektorlar páter-páterdi aralap, turǵyndarmen tyǵyz baılanys ornatty. Reıd barysynda olar aty-jónderi jáne baılanys nómirleri bar vızıtkalaryn taratty. Qalalyq ýchaskelik 73 ınspektor búginde is-sharany ótkizdi. Olardyń telefony kúni-túni qosýly. Tek demalysqa ketkende ǵana sóndire alady. Al joba iske qosylǵaly qala turǵyndary óz ınspektorlaryna tegin habarlasyp, máseleni birlese sheshe alady. Bul eki jaqqa da tıimdi», - deıdi Petropavl qalalyq Polıtsııa basqarmasy jergilikti polıtsııa qyzmeti bóliminiń bastyǵy Álibek Ǵabdýlın.
Polıtsııa departamenti barlyq bólimshelerimen baılanysý úshin tsıfrly avtomattandyrylǵan 7 telefon stansasyn qoldanady. Al «102» nómirine uıaly telefonnan da tegin habarlasyp, polıtseılerdi shaqyrtýǵa bolady.
