Petropavl qalasynyń ataýyn ózgertý týraly másele kóterilgen joq - ákim

Petropavl qalasynyń ákimi Bolat Jumabekov qalanyń ataýyn ózgertý týraly onlaın-petıtsııaǵa qatysty oıyn bildirdi, - dep habarlaıdy QazAqparat.

Ol áleýmettik jelidegi paraqshasynda aldymen bul bastamany memleket emes, jeke tulǵa kóterip otyrǵanyn atap ótken.

«Men, qazirgi ýaqytta áleýmettik jelilerde Petropavl qalasynyń ataýyn ózgertý týraly onlaın-petıtsııanyń jaqtastary men qarsylastarynyń pikirtalastary júrip jatqanyn baıqadym. Bul petıtsııany jeke tulǵa memlekettik emes saıtta jasaǵanyn atap ótkim keledi. Memlekettik organdardyń bul bastamaǵa qandaı da bir qatysy joq. Qala ákimdiginiń kún tártibinde qaıta ataý týraly másele kóterilmegenin resmı túrde málimdegim keledi», - dedi Jumabekov Facebook-paraqshasynda.

Ákim bul másele týyndaǵan jaǵdaıda da, ony qaraý qalada turatyn halyqtyń pikirin eskere otyryp, eldiń onomastıka salasyndaǵy qoldanystaǵy zańnamasyna sáıkes júrgiziletinin aıtady.

«Sondyqtan men azamattardy ózara qurmet kórsetýge shaqyramyn jáne áleýmettik jelilerde pikir qaldyrý kezindegi jaýapkershilik týraly eske salǵym keledi. «Jańa Qazaqstanda biz árdaıym «ár túrli kózqarastar, biraq birtutas ult» qaǵıdatyn ustanýymyz qajet«, - dep aıtqan bolatyn elimizdiń Prezıdenti Qazaqstan halqyna Joldaýynda. Bizdiń qalamyzdyń turǵyndary Prezıdentpen birdeı pikirdi ustanyp jáne biz bir-birimizge qatysty joǵary mádenıet tanytatynymyzǵa senimdimin», - dedi ákim.