Petropavl qalasynda Gorkıı kóshesi ýaqytsha jabyldy
PPETROPAVL. QazAqparat – Petropavlda Gorkıı kóshesi qaıta jóndeý jumystaryn júrgizý úshin jabyldy. Jumys aıaqtalǵansha atalǵan kóshedegi qozǵalys shekteledi, dep habarlaıdy QazAqparat tilshisi.
Qalalyq turǵyn úı-kommýnaldyq qyzmet, jolaýshylar kóligi men avtomobıl joldary bóliminiń málimetinshe, Sútishev kóshesinen Petrov kóshesine deıin qaıta jóndeý jumystary júrgiziledi. Áleýmettik mańyzy bar nysandar men turǵyn úılerge qoljetimdilikti qamtamasyz etý úshin ýchaskeler toqsan saıyn jabylatyn bolady.
Birinshi kezeńde Sútishev kóshesinen Muqanovqa deıingi joldyń bir bóligi, ekinshi kezeńde Ýlıanovtan Popovqa deıin jáne úshinshi kezeńde Muqanovtan Partızan kóshesine deıin jabylady.
Bólim naqty merzimderdi atamady. Joba boıynsha Gorkıı kóshesiniń kólik júretin bóligin 15 metrge deıin keńeıtý, trotýarlar, oń jaq aınalma joldar, uzyndyǵy 2,1 km jabyq nóser kárizin ornatý, 92 jaryqtandyrý baǵanalaryn, aıaldama pavılondary men jol belgilerin ornatý, aǵash otyrǵyzý kózdelgen.
29 sáýirde qaladaǵy taǵy bir ortalyq kóshe – Bóketov kóshesiniń Jambyldan Nazarbaevqa deıingi ýchaskesi jabyldy. Qala ákimdigi bul jobanyń eki jyldyq ekenin eske saldy. Bıyl olar nóser kárizin ornatýmen jáne kósheni abattandyrýmen aınalysady. Jumys bıyl aıaqtalady.
