Petropavl qalasyna tasqyn sý jaqyndap qaldy
PETROPAVL. QazAqparat – Soltústik Qazaqstan oblysynyń shaǵyn ózenderi men Sergeev sý qoımasynda erneýinen tasyp tógilgen sýdyń deńgeıi túse bastady. Degenmen, bógetten tómen ornalasqan gıdrologııalyq beketterde kerisinshe, sý kóterilip keledi, dep habarlaıdy QazAqparat tilshisi.
Soltústik Qazaqstandaǵy Sergeev sý qoımasy 5 sáýirden bastap tasyp, 8 sáýir kúni eń joǵary kórsetkish tirkeldi. Bul kúni bógettiń arnasynan asqan sýdyń bıiktigi 196 sm jetti. Bul 2020 jylǵy kórsetkishpen teń.
«Qazgıdromet» RMK SQO fılıalynyń málimetinshe, qazir sý qoımasynyń erneýinen tógilgen sýdyń bıiktigi – 145 sm.
Esil ózeniniń salalarynda sý qaıtyp jatyr, al Sergeev sý qoımasynan tómen ornalasqan gıdrologııalyq beketterde kerisinshe sý deńgeıi kóterilip keledi. Máselen, Pokrovka eldi mekeniniń mańynda bir táýlikte 139 sm, Novonıkolskoe eldi mekeniniń mańynda 275 sm kóterildi.
Tasqyn sý oblys ortalyǵyna da jetip qaldy. Petropavl sý qoımasyndaǵy bekitpelerdi ashqannan keıin qala mańyndaǵy gıdropostta bir táýlikte sý deńgeıi 136 sm joǵarylady.
Sınoptıkterdiń boljamynsha, búgin SQO-da jaýyn-shashynsyz. Túnde tuman bolýy múmkin. Kúndiz qatty jel turyp, onyń ekpini sekýndyna 23 metrge deıin jetýi yqtımal. Túnde synap baǵanasy -5 gradýsqa deıin tómendese, kúndiz aýa raıy +9+14 gradýsqa deıin jylynbaq.
Esterińizge salaıyq, Soltústik Qazaqstanda sońǵy ret aýqymdy sý tasqyny 2017 jyly boldy. Ol kezde Sergeev sý qoımasynyń arnadan asyp tógilgen sýdyń deńgeıi 338 sm jetken edi. Al byltyr nebary 48 sm-ge ǵana tasydy.
