Petropavl qalasy eki kúnge aýyzsýdan ajyratylady

PETROPAVL. QazAqparat – Petropavlda aldaǵy demalys kúnderi sý berý toqtatylady. Sý berýshi kásiporyn turǵyndarǵa 2-3 táýlikke jetetin sý qoryn jasap alýǵa keńes berdi, dep habarlaıdy QazAqparat tilshisi.

Petropavlda 17-18 qyrkúıek kúnderi sý bolmaıdy. Oblys ortalyǵyn sýmen qamtıtyn «Qyzyljar sý» JShS osy aralyqta sýmen jabdyqtaý jelicinde dezınfektsııalaý jáne jýyp-shaıý jumystaryn júrgizbek. Bul jyl saıynǵy profılaktıkalyq jumys, sýdyń sapasyn jaqsartý úshin qajet.

Shaharda sý 17 qyrkúıekke qaraǵan túni saǵat 00:00-de sóndiriledi. Eki kún turǵyndar sýsyz otyrmaýy úshin mamandar habardar etip, ydystarǵa aldyn ala sý toltyryp alýǵa keńes berýde. Sý berilgennen keıin de ony birden paıdalanbaǵan jón. Óıtkeni tehnıkalyq sý aǵyp, quramynda hlor bolady.

«Jazda Esil ózeniniń sý temperatýrasy kóterilip, sý qoımasynda mıkrobıologııa kórsetkishteri artady. Saldarynan sýdyń sapasy nasharlaıdy. Sý sapasyn qalypty ustaý maqsatynda sý jelisi tolyq jýylyp, zararsyzdandyrylady. Jalpy berilip jatqan sýdyń sapasyn baqylaýda ustaý úshin kúndelikti qalanyń ár aýdanynan 15 synama alyp tekseremiz», - deıdi «Qyzyljar Sý» JShS-niń zerthana meńgerýshisi Galına Tıýmeneva.

Al jumysyn toqtatýǵa bolmaıtyn kásiporyndarǵa, naýbaıhanalarǵa, nan kombınattaryna qajetti sý jetkizilip otyrady. Sol sııaqty aýrýhanalarǵa da bul kúnderi sý tasymaldanady.