Petropavl qalasynyń kireberisine Botaıǵa arnalǵan monýment ornatylady

PETROPAVL. KAZINFORM – Soltústik Qazaqstan oblysynda bıyl mádenıet nysandaryn kúrdeli jóndeýge jáne jańa jobalardy júzege asyrýǵa 1 mlrd 141 mln teńgeden astam qarajat jumsalmaqshy.

Petropavlda «AMANAT» partııasy janyndaǵy respýblıkalyq «Miras» qoǵamdyq keńesiniń kóshpeli otyrysy ótti. Jıyn SQO-nyń mádenı murasyn saqtaýǵa jáne nasıhattaýǵa arnaldy. 
Oblystyq mádenıet, tilderdi damytý jáne arhıv isi basqarmasynyń basshysy Dosbol Ábdirıisovtiń málimetinshe, bıyl 13 mádenıet nysanyn kúrdeli jóndeý mindeti tur. Salaǵa «Aýyl – El besigi» baǵdarlamasy boıynsha 382,1 mln teńge, oblystyq bıýdjetten 759 mln teńge bólingen.

- Bıyl atqarylar jumys aýqymdy. Qarasaı-Aǵyntaı memorıaldyq kesheninde ǵylymı-restavratsııalaý jumystary júrgiziledi. Bul joba eki jyldyq, 200 mln teńge bólingen.

Ýálıhanov aýdanynyń ortalyqtandyrylǵan kitaphana júıesin kúrdeli jóndeý úshin 150 mln teńge jumsalady. Aıyrtaý, Mamlıýt jáne Jambyl aýdandaryndaǵy mádenı ortalyqtar da jónge keltiriledi, - deıdi Dosbol Ábdirıisov.

Sondaı-aq, Maǵjan Jumabaevtyń shyǵarmashylyq murasyn zertteýge arnalǵan «Maǵjan ortalyǵy» jańa mádenı ortalyǵy ashylady. Bul maqsatqa 243 mln teńge bólingen. 

- Ulttyq biregeılikti nyǵaıtý jáne arheologııalyq murany dáripteý maqsatynda Petropavl qalasynyń kireberisinde «Botaı» arheologııalyq eskertkishine arnalǵan monýmentaldy eskertkishti ornatý josparlanǵan. Bul jobany júzege asyrýǵa 160 mln teńge bólindi, - deıdi basqarma basshysy.

Keńeske qatysqan «Miras» respýblıkalyq qoǵamdyq keńesiniń tóraǵasy Amanjol Áltaev Botaı mádenıetine erekshe nazar aýdarý qajettigin atap ótti.

- Botaı qonysynan jetken jádigerlerden tartyp, ótken ǵasyrlardan mıras bolǵan mádenı muralarǵa deıin erekshe kóńil aýdarýymyz qajet. Keshegi Býrabaıda ótken IV Quryltaıda men óz tarapymnan birneshe usynys joldadym. Sonyń biri – arnaıy Tulpar kúnin belgileý. Adamzat balasynyń tarıhyndaǵy Botaı mádenıeti, Botaı qonysy, jylqy túligin eń alǵash qolǵa úıretken bizdiń ata-babalarymyz ekeni dáleldendi. Sondyqtan osynyń basynda Qyzyljar óńiri turý kerek dep oılaımyn, - dedi Amanjol Áltaev.

Esterińizge salaıyq, Astanada Botaı jylqysyna eskertkish ornatylyp, ashyq aspan astynda mýzeı qurý josparda barlyǵyn jazǵan edik.