Petropavl irgesindegi saıajaıda shyqqan órtten 7 úı janyp ketti
PETROPAVL. QazAqparat - Petropavl mańynda ornalasqan saıajaı kooperatıvinde shyqqan órtti tek 3,5 saǵattan keıin ǵana sóndirý múmkin boldy, dep habarlaıdy QazAqparat tilshisi.
Tótenshe jaǵdaı Petropavldaǵy «Raketa» saıajaı kooperatıvinde boldy. Qýraǵan shópten bastalǵan órtti daýyl órshitip, sonyń saldarynan órt sóndirýshilerge barlyq kúshti jumyldyrýǵa týra keldi. Oqıǵa ornynda 48 qyzmetker jáne 11 tehnıka jumys istedi.
«Dabyl boıynsha departamenttiń barlyq kúsh qurylymdary kóterildi. Búgingi kún raıy jaǵdaıdy ýshyqtyryp tur. Jeldiń jyldamdyǵy sekýndyna 25-ten 30 metrge deıin. Bul óz kezeginde bizge kedergi jasap baǵýda. Sondaı-aq tar kósheler de jumysty qıyndata tústi», - dedi SQO TJD bastyǵynyń orynbasary Nurlan Atyǵaev.
Tótenshe jaǵdaılar komıtetiniń málimetinshe, túski birler shamasynda bastalǵan órtti mamandar tek 3,5 saǵattan keıin ǵana tolyq sóndirdi. Jalyn sharpyǵan aýmaq 1,5 myń sharshy metr. Jeti saıajaı úıi janyp ketti.
Mamandardyń boljamynsha, órt turǵyndardyń qarapaıym qaýipsizdik talaptaryn saqtamaýynan shyǵýy múmkin.
