10:45, 13 Sáýir 2020

Petropavl gıdrotorabynda sý deńgeıi kóterildi

PETROPAVL. QazAqparat – Soltústik Qazaqstan oblysyndaǵy sý qoımalarynda sý deńgeıi tómendegenimen, Petropavlǵa qaraı Esil ózeniniń sýy molaıa túsken, dep habarlaıdy QazAqparat tilshisi.

«Qazgıdromet» RMK SQOF málimetinshe, Esil ózeniniń Pokrovka, Novonıkolskoe eldi mekenderiniń mańynda jáne Petropavl gıdrotorabynda Sergeev sý qoımasynan kelgen sýdan deńgeıi kóterilip keledi. Bir táýliktiń ishinde Esil ózeni Pokrovka mańynda 88 sm artyp, sý alqapqa jaıyldy. Shekti deńgeı 950 sm bolsa, búginde odan asyp, 1060 sm jetti. Novonıkolskoe mańynda sý 54 sm kóterildi. Sergeev sý qoımasyndaǵy bógettiń qyrynan 162 sm asyp tógilip jatyr, ıaǵnı 19 sm tústi.

Petropavl sý qoımasynda sý 37 sm kóterildi. Mamandardyń aıtýynsha, qaýipti deńgeı 1050 sm, búgingi kórsetkish – 827 sm. 940 sm jetkende Esil ózeni arnasynan shyǵyp, alqapqa jaıylady. Sý deńgeıi 960 sm bolǵanda, sý halyqaralyq mańyzdaǵy «Chelıabi-Novosibir» tas jolynan ótedi.

SQO-da 2017 jyly kóktemgi sý tasqyny qıyn jaǵdaıda ótti. Sol jyly Petropavl sý qoımasynyń bógetinen 338 sm sý asyp tógilgen eken. 2018 jyly asyp tógilý deńgeıi 168 sm bolsa, byltyrǵy maksımaldy kórsetkish 132 sm quraǵan.

Soltústik Qazaqstan oblysy Sý tasqyny Qoǵam

Aqerke Dáýrenbekqyzy

Avtory