Petropavl-Gannover áýe reısi qaıta jańǵyrýy múmkin
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov Germanııanyń Qazaqstandaǵy Tótenshe jáne Ókiletti elshisi Tılo Iohanes Klınnermen kezdesti, dep habarlaıdy QazAqparat tilshisi.
Oblys ákimi baspasóz qyzmetiniń habarlaýynsha, kezdesýde aýyl sharýashylyǵy salasynda birlesken jobalardy júzege asyrý týraly sóz boldy.
Oblysta «CLAAS» kompanııasynyń aýyl sharýashylyǵy tehnıkasyn qurastyratyn zaýytty ashý týraly aıtyldy. Qumar Aqsaqalovtyń pikirinshe, nátıjesinde jergilikti sharýalardyń zamanaýı tehnıkaǵa qoly jetimdi bolady, jumys ónimdiligi artady.
«Nemis kombaındary bizde qurastyrylsa, onyń baǵasyn 52 paıyzǵa arzandata alamyz. Dıqandar shyǵymdylyq pen eńbek ónimdiligin arttyra alady. Oblysta «CLAAS» kompanııasynyń 400 tehnıkasy bar. Sáıkesinshe, qosalqy bólshekter qoımasy bar qyzmet kórsetý ortalyǵy kerek. Bizde ǵımarat daıyn, oǵan qajetti ınfraqurylym tartylǵan», - dedi Qumar Aqsaqalov.
Óńir basshysynyń aıtýynsha, Germanııanyń tájirıbesine súıene otyra gerbıtsıd shyǵaratyn zaýytty da ashýǵa bolady. Birlesken kásiporyndarǵa ǵımarattar daıyn. Sondaı-aq oblys ákimi Petropavl-Gannover áýe qatynasyn qaıta jańǵyrtýdy usyndy.
Nemis elshisi oblys ákiminiń usynystaryn qoldap, Germanııa ózara yntymaqtastyqty odan ári nyǵaıtýǵa nıetti ekenin jetkizdi.
«SQO Reseıdiń óńirlerimen shektesedi. Bul jerde kólik logıstıkasy jaqsy damyǵan. Biz eki eldiń arasyndaǵy taýar aınalymyn údete alamyz. Agrosektor – birlesken jobalar úshin tıimdi sala. Soltústikqazaqstandyq ónimdi Germanııaǵa jetkizý bizge de tıimdi bolmaq», - dedi Tılo Iohanes Klınner.
