Petropavl forýmy: Qazaqstan men Reseı 35 qujatqa qol qoıdy
ASTANA. QazAqparat - QR Syrtqy ister mınıstrliginiń resmı ókili Aıbek Smadııarov Petropavlda ótken Qazaqstan men Reseı óńiraralyq yntymaqtastyq XV forýmynyń negizgi qorytyndylaryn baıandady, dep habarlaıdy QazAqparat tilshisi.
«Ózderińizge málim, forým qorytyndysy boıynsha eki eldiń prezıdentteri 2019-2021 jyldarǵa arnalǵan birlesken is-qımyl josparyna qol qoıǵan bolatyn. Bul qujat saıası, ekonomıkalyq, mádenı, gýmanıtarlyq jáne basqa da salalarda eki eldiń praktıkalyq ózara is-qımylyn odan ári tereńdetý sharalaryn aıqyndaıdy», - dedi Aıbek Smadııarov QR Syrtqy ister mınıstrliginde ótken aptalyq brıfıngte.
Forýmnyń negizgi maqsaty - týrızm salasynda Qazaqstan men Reseıdiń ózara is-qımylyn keńeıtý. Atap aıtqanda, eki eldiń isker toptary men memlekettik qurylymdary arasyndaǵy kooperatsııalyq baılanystardy tereńdetý arqyly týrızm túrlerin damytý, ozyq tájirıbelermen almasý, týrıstik ındýstrııaǵa ózara ınvestıtsııalardyń kelýin yntalandyrý.
«Qazaqstan Prezıdenti Nursultan Nazarbaev týrısterge shekaradan ótý úshin yńǵaıly jaǵdaı jasaý masqatynda Qazaqstan-Reseı shekarasyndaǵy shekaralyq ótkizý beketterin jańǵyrtý, týrıstik kóliktik-logıstıkalyq ınfraqurylymdy jetildirý, birlesken kúsh-jigermen Kaspıı teńizindegi týrızmdi damytý jáne ǵaryshtyq týrızmdi damytýǵa yqpal etýdi usyndy», - dep tolyqtyrdy sózin resmı ókil.
A. Smadııarovtyń aıtýynsha, forým aıasynda 35-ke jýyq qujatqa qol qoıyldy, onyń ishinde 3 úkimetaralyq, 3 vedomstvoaralyq, 10 óńiraralyq jáne 19 kommertsııalyq sıpattaǵy qujat bar.
Kelesi Qazaqstan men Reseı óńiraralyq yntymaqtastyq forýmy 2019 jyly Omby qalasynda ótedi.
