Petropavl: Esil jaǵasynda júrgen jasóspirim jardan qulap ketti
PETROPAVL. QazAqparat – Petropavl qalasynda 14 jastaǵy jasóspirim Esil jaǵasynda qydyryp júrip, jardan qulap ketti, dep habarlaıdy QazAqparat tilshisi.
Soltústik Qazaqstan oblystyq polıtsııa departamenti baspasóz qyzmetiniń málimetinshe, oqys oqıǵa 2 qazan kúni keshki saǵat 21.00 shamasynda bolǵan. Jeńis saıabaǵynda kezekshilikte júrgen patrýldik polıtseılerge bir bala júgirip kelip, kómek suraǵan. Ol jardan adamnyń qulap ketkenin aıtqan. Polıtseıler tez arada jetkenimen, dala qarańǵy bolǵandyqtan eshteńe kóre almaıdy.
«Bolǵan jaǵdaıdy Jedel basqarý ortalyǵyna habarladyq. Bizge kómekke jaqyn mańda júrgen avtopatrýlder ekıpajy jetti. Tik jar bolǵandyqtan balany birden tabý múmkin bolmady», - deıdi polıtsııa starshınasy Aıdarbek Kenshinbaev.
Tártip saqshylary Nurlan Qoqabaev pen Qaıyr Syzdyqov tik jardan 30 metr tómen túsip, qol shamnyń jaryǵymen qulaǵan jasóspirimdi tabady. Arqannyń kómegimen ony joǵary shyǵaryp, jedel járdem qyzmetkerleri balaǵa alǵashqy medıtsınalyq kómek kórsetti. Jasóspirim ata-anasyna tapsyryldy.
Ol sol kúni dosy ekeýi Esil ózeniniń jaǵasyna qydyrýǵa shyqqan. Alaıda, qarańǵyda tik jardy baıqamaı abaısyzda qulap ketipti. Jaqyn jerde kezekshilik etip júrgen polıtseılerdiń arqasynda kómek tez arada jetti.
Buǵan deıin maýsymda patrýldik polıtsııa qyzmetkerleri sýǵa kete jazdaǵan balyqshyny qutqardy.
Kóktemde tártip saqshylary jardan qulaǵan qyzdy aman alyp qaldy.
«ІІM tapsyrmasy boıynsha sý qoımalarynyń mańynda qyzmet atqaratyn patrýldik polıtsııanyń barlyq ekıpajdary adamdardy qutqarýǵa arnalǵan qajetti quraldarmen jabdyqtaldy. Osy joly da adamdy qutqarýda qýaty kúshti qolshamdar men arqannyń kóp kómegi tıdi», - deıdi polıtseıler.
