Petropavl «Eńbek dańqy qalasy» atanady

PETROPAVL. KAZINFORM — Petropavl «Eńbek dańqy qalasy» qurmetti ataǵy bar elimizdegi tórtinshi qala bolmaq.

Soltústik Qazaqstan memlekettik arhıviniń dırektory Sáýle Málikovanyń aıtýynsha, Petropavl qalasynyń tylda etken eńbegi orasan. Soǵys bastalysymen qalaǵa 20 zaýyt evakýatsııalanǵan. 

— Petropavlǵa kóshirilgen zaýyttardyń beseýi osy jerde alǵash ret soǵysqa arnalǵan qarý-jaraqty shyǵara bastady. Kópshilikke tanymal, aty ańyzǵa aınalǵan «Katıýsha» qarýynyń syrtqy qaptamasy da osy jergilikti kásiporyndarda jasaldy, budan basqa torpeda snarıadtary da shyǵarylǵan. № 641 atalǵan qazirgi Kırov atyndaǵy zaýyt Petropavlǵa 1941 jyly kóshirilgen. Sol kezde onymen birge 30 maman keldi. Jumysshylarynyń basym kópshiligi jergilikti turǵyndar boldy. Mine, osy zaýyttan shamamen 1200 adam quny sol kezdegi «Erligi úshin» medalimen para-par «Za trýdovýıý doblest» medalimen marapattaldy, — deıdi Sáýle Málikova.

Mamannyń aıtýynsha, soǵys jyldarynda tylda janqııarlyqpen eńbek etip, maıdandy áskerı jáne turmystyq ónimmen qamtamasyz etken qalalarǵa «Eńbek dańqy qalasy» qurmetti ataǵy beriledi. Elimizde bul ataqty Astana, Almaty jáne Qaraǵandy qalalary bıyl aldy. 

— Mundaı sheshimdi TMD-nyń Gýmanıtarlyq yntymaqtastyq keńesi qabyldaıdy. Ol úshin resmı túrde ótinish berip, talap boıynsha qajetti qujattardy jiberý kerek. Biz onyń bir bóligin jiberdik. Bul ataqty alǵannan keıin qalada jańa mártebe týraly aqparatpen arnaıy stelalar ornatylady, — deıdi Sáýle Málikova.

Buǵan deıin Petropavlda soǵys ýaqytyndaǵy mańyzdy nysandardyń onlaın kartasy jasalyp jatqanyn jazǵan edik.