Petropavl bıznesmenderi 3 mlrd teńge salyqtan jaltarǵan
Bul jóninde Óńirlik kommýnıkatsııalar qyzmetiniń brıfınginde Soltústik Qazaqstan oblysy boıynsha Memlekettik kirister departamenti basshysynyń orynbasary Nurymjan Abatov málim etti.
«Birneshe jyl boıy kásipkerlerge salyq tóleýden jaltarýǵa múmkindik berip kelgen qylmystyq toptyń áreketin áshkereledik. Olar jalǵan shot-faktýralardy jasaýmen aınalysqan. Kelgen shyǵyn somasy boljam boıynsha, 3 mıllıard teńgeden asady», - dedi N. Abatov.
Departament qyzmetkerleri qylmystyq topty ustaý boıynsha birqatar jedel tergeý sharalaryn ótkizgen. Nátıjesinde, ýaqytsha ustaý abaqtysyna 2 adam - qylmysty uıymdastyrýshy men ony oryndaýshy jetkizildi. Keıin sot sanktsııasymen olarǵa qamaýda ustaý túrindegi bultartpaý sharasy qoldanyldy. Uıymdasqan qylmystyq top músheleriniń úıleri men keńselerinen iske qatysy bar noýtbýktar, júıelik bloktar, prınterler, flesh-jınaqtaýshylar, elektrondy sandyq qoltańbalar kiltteri, mór men shtamptar, aqsha men basqa da quraldar tabyldy.
Tergeý amaldary júrgizilýde.
Aıta keteıik, bıyl Soltústik Qazaqstan oblysynyń salyq salasynda 26 qylmys tirkelip, onyń ekeýi sotqa jóneltildi.