Petropavl aýlalarynda zańsyz qorshaýlar alynyp jatyr
PETROPAVL. QazAqparat – Petropavlda aýlalardaǵy zańsyz qoıylǵan qorshaýlar men shlagbaýmdar alynyp jatyr, dep habarlaıdy QazAqparat tilshisi.
Petropavl qalasy ákimi baspasóz qyzmetiniń málimetinshe, shahar basshysy Bolat Jumabekov aýlalardaǵy zańsyz ornatylǵan qorshaýlardy, joldy bógegen temirbeton bloktar men shlagbaýmdardy alýǵa tapsyrma berdi.
«Tótenshe jaǵdaılar basqarmasy men Petropavl qalalyq ákimdigi qyzmetkerleri birlese aýlalardaǵy zańsyz qoıylǵan, kirýdi shektegen bloktar men shlagbaýmdardy alyp jatyr. Qorshaýlardy turǵyndardyń ózderi ornatady. Olardyń oıynsha, bul aýladaǵy qozǵalysty shektep, qaýipsizdikti qamtamasyz etýge kómektesedi. Alaıda, tosqaýyldardy ornatý jedel járdem, órt sóndirý jáne taǵy basqa shuǵyl qyzmet mashınalarynyń ótýine kedergi keltiredi, - deıdi Petropavl qalalyq tótenshe jaǵdaılar basqarmasynyń bas mamany Áset Shaıkın.
Birer kúnniń ishinde Petropavldaǵy aýlalardan 4 temirbeton blogy jáne 7 temir qorshaý bólshektelip, alyndy.
Eske salsaq, Petropavlda jaqynda kóp qabatty turǵyn úıden órt shyǵyp, úsh balkon janyp ketken edi.
Órt sóndirýshilerdiń aıtýynsha, olar kópke deıin aýlada turǵan kólikter men joldy bógegen temirbeton bloktardan órt ornyna jete almaǵan.
