Petropavl áýejaıyna Shymkentten ushqan ushaq qona almady
PETROPAVL. QazAqparat - Petropavl halyqaralyq áýejaıy aýa raıynyń qolaısyzdyǵyna baılanysty Shymkentten ushyp kelgen ushaqty qabyldaı almady, dep habarlaıdy «QazAqparat» HAA tilshisi.
Keshe Petropavlda birneshe saǵat boıy qar aralas jańbyr jaýyp, kúshti jel turdy. Áleýmettik jelide aýa raıynyń qolaısyzdyǵyna baılanysty ushaq Petropavlǵa emes, Astanaǵa qonatyny týraly aqparat tarady.
«Ushaq Petropavlǵa 20:20-da qonýy tıis edi. Ary qaraı basqa kólikpen jetetin boldyq», - dep jazdy Feısbýk qoldanýshylardyń biri.
«Petropavl halyqaralyq áýejaıy» AQ dırektorynyń orynbasary Ýálıhan Jylysbaev bul aqparatty rastady. Onyń sózine qaraǵanda, jolaýshylar Petropavlǵa avtobýspen jetkizilgen.
Sondaı-aq Soltústik Qazaqstan oblysynyń ortalyǵynan Almatyǵa ushatyndar da avtobýspen Astanaǵa deıin jetkizildi. «774 «Shymkent-Petropavl» reısi (ushaq Shymkentten Petropavlǵa deıin ushyp, Petropavldan Almatyǵa 738-reıspen ushýy tıis) keste boıynsha ushqan. Ushaq bortynda 12 adam bolǵan. Ushý kezinde aýa raıy kúrt ózgerip, áýe kemesiniń komandıri Astanadaǵy zapas aerodromǵa qonýǵa sheshim qabyldady.
Óıtkeni Kókshetaý jáne Qostanaı áýejaılary da aýa raıyna baılanysty jabylǵan. Áýe kompanııasy Almatyǵa bılet alǵan jolaýshylardy da Astanaǵa deıin avtobýspen jetkizýge sheshtik. Shymkentten ushyp kelgen jolaýshylardy da Astanadan Petropavlǵa avtobýspen jetkizdik. Astana-Almaty reısi 06:50-de ushyryldy», - dedi Ýálıhan Jylysbaev.
