Petropavl áýejaıyn jóndeý jumystary bastaldy
ASTANA. QazAqparat - 28 shildede «Petropavl áýejaıynda aerodrom tósemderin, ushý-qoný jolaǵyndaǵy jasandy tósemdi, perrondy qalpyna keltirý jáne OVI-1 jaryq sıgnaldy qondyrǵysyn ornatý» jobasyn júzege asyrý jumystary bastaldy, dep habarlady QR Investıtsııalar jáne damý mınıstrliginiń Azamattyq avıatsııa komıtetinen.
Qala áýejaıyn rekonstrýktsııalaý boıynsha bas merdiger elektrondy konkýrs nátıjesi boıynsha «K-Dorstroı» AQ tanyldy. Oǵan jobalyq-smetalyq qujat pen qurylys alańy tapsyryldy.
Jobada ushý-qoný jolaǵyn qalyńdyǵy 10 sm quraıtyn asfaltty betonmen jabý, ony 300 metrge uzartý, 18 metrge keńeıtý, sonymen qatar ushý joly men perrondy qalypqa keltirý qarastyrylǵan. Bul jumystardan keıin ushý-qoný jolaǵy A-320-200, A-310-300, Boıng-767-200/300, Boıng-757-200/300 áýe kemelerin qabyldaı alady.
Osyǵan oraı, qurylys aıaqtalǵanǵa deıin bul áýejaı arqyly ushý-qoný toqtatyldy. Áýejaıdy tolyq qalpyna keltirý jumystaryn 2016 jyly aıaqtaý kózdelgen.
