Petropavl áýejaıy satylymǵa shyǵaryldy
Tender talabyna sáıkes Petropavl áýejaıy senimgerlik basqarýǵa 3 jylǵa beriledi. Nysandy alǵan ınvestor 10 jyl boıy áýejaı beıinin ózgertpeı, tıisti talaptardy oryndap, qaýipsizdikti qamtamasyz etýi qajet. Osy aralyqta kásipker 1,5 mlrd teńge qarjy quıyp, atqarylǵan jumys jaıynda ár jyldyń basynda esep berýi tıis.
Halyqaralyq áýejaıdyń múlki 5,6 mlrd teńgege baǵalandy. Aýktsıon 31 naýryzǵa josparlanǵan jáne saýda-sattyqqa bir ǵana ınvestor qatyssa da ol ótken bolyp esepteledi.
«Memlekettik menshik nysany básekege qabiletti bolyp, qyzmetterdiń sapasyn damytyp, jaqsartýy úshin ınvestorǵa senimgerlik basqarýǵa berý tıimdi tetikterdiń biri bolyp esepteledi. Áýejaı mınıstrlikter vedomstvosynda bolǵanda memlekettik basqarý tájirıbesinen ótti. Alaıda, bul mehanızm kásiporyndy damytýǵa, usynylatyn qyzmetterdiń sapasyn arttyrýǵa, tar mamandyqtaǵy qyzmetkerler úshin tıisti jaǵdaılardy jasaýǵa múmkindik bermedi. Básekege qabiletti, qarjylaı turaqty, damýshy áýejaılar jeke kompanııalardyń senimgerlik basqarýyna ótken nemese memlekettik-jekeshelik áriptestikte. Biz taldaý júrgizdik. Ótken jyldyń qarasha-jeltoqsan aılarynda aptasyna 10 ret Nur-Sultan qalasyna, eki ret Túrkistanǵa jáne úsh ret Almatyǵa reıster shyǵarý áýejaıdyń júktemesin arttyrdy. Alaıda, alynǵan tabys tipti jumysshylardyń eńbekaqy qoryn qamtamasyz ete almady. Qazir reısterdi sýbsıdııalaý áýejaıdyń úzilissiz jumys isteýine múmkindik berip tur. Memlekettik organ áýejaıdyń eńbekaqy, kommýnaldyq qyzmetter, qyzmetkerlerdi sertıfıkattaý jáne oqytý sııaqty aǵymdaǵy shyǵyndaryn qarjylandyra almaıdy», - deıdi jolaýshylar kóligi jáne avtomobıl joldary basqarmasynyń basshysy Maqsat Baıahmet.
Mamannyń aıtýynsha, Petropavl halyqaralyq áýejaıynan Nur-Sultan, Almaty, Túrkistan jáne Shymkent qalalaryna sýbsıdııalanǵan reıster shtattyq rejımde júzege asyrylady.
