Petropavl áýejaıy Londonnan keletin ushaqty qabyldaıdy
PETROPAVL. QazAqparat – 14 sáýir kúni bortynda Qazaqstan azamattary bar Londonnan ushyp keletin ushaq Petropavl halyqaralyq áýejaıyna qonady, dep habarlaıdy QazAqparat tilshisi.
Soltústik Qazaqstan oblysynyń ákimdigi aımaq turǵyndarynyń qaýipsizdigi qamtamasyz etiletinine sendirdi. Sanıtarlyq-epıdemıologııalyq qaýipsizdik pen COVID-19 taralýyn boldyrmaýdyń barlyq sharasy jasalady.
Ázirge otandastarymyz elge «Air Astana» áýekompanııasynyń Airbus A321 Neo ushaǵymen jetkiziletini ǵana belgili. Londonnan keletin adam sany týraly habarlanǵan joq.
«Bekitilgen algorıtmge sáıkes, jergilikti atqarýshy organdar azamattardy qabyldaý boıynsha barlyq is-áreket úılestirilgen, barlyq qajetti kúshter men quraldar bar. QR Bas memlekettik sanıtarlyq dárigeriniń qaýlysyna sáıkes azamattar COVID-19-ǵa zerthanalyq tekserý júrgizý úshin 2 táýlikke oqshaýlanady. Ári qaraı nátıjeler shyqqan soń úı karantınine jiberý úshin óz óńirlerine uıymdasqan túrde jiberiledi. Reısti qabyldaý jáne otyrǵyzý Respýblıkalyq shtabpen kelisilgen. Barlyq qosymsha sharalar týraly habarlanatyn bolady», - delingen oblys ákimdiginiń habarlamasynda.
Osyǵan baılanysty qosymsha aqparatty oblys ákiminiń orynbasary Rýslan Álishev 13 sáýirde ótetin brıfıngide habarlaıdy.
