Petropavl áýejaıy Londonnan keletin 100-ge jýyq adamdy qabyldamaq
PETROPAVL. QazAqparat – Petropavl halyqaralyq áýejaıy 14 sáýir kúni «Air Astana» áýe kompanııasynyń Londonnan keletin ushaǵyn qabyldaıdy, dep habarlaıdy QazAqparat tilshisi.
Shetelden keletin ushaqta elge oralǵan qazaqstandyqtar bolady. Búginde olardy bekitilgen algorıtm boıynsha qarsy alýǵa bar jaǵdaı jasalǵan. Soltústik Qazaqstan oblysy ákiminiń orynbasary Rýslan Álishev kezekti brıfıng barysynda osy jaǵdaıǵa baılanysty turǵyndardyń alańdaýyna negiz joqtyǵyn aıtty.
«Shetelden keletin azamattardy qabyldaý boıynsha barlyq is-sharalar úılestirildi. COVID-19 taralmaýy úshin sanıtarlyq-epıdemıologııalyq qaýipsizdik eskerildi. Sonyń ishinde áýejaı ishi, júk pen olardy ornalastyrý aýmaǵy dezınfektsııalanady. Kelgen jolaýshylar polıtsııanyń kómegimen karantın oshaǵyna arnaıy baǵytpen jetkiziledi», - dedi Rýslan Álishev.
Ushaqpen kelgen jolaýshylar Petropavldaǵy meımanhanalardyń birine ornalastyrylmaq. Onyń aýmaǵy qorshaýǵa alynyp, baqylanatyn bolady. Kirip-shyǵýǵa qatań shekteý qoıylady.
«Kelýshilerge barlyq jaǵdaıdy jasadyq. Olar tegin aspen qamtylyp, túrli baǵyttar boıynsha keńes alady. Jolaýshylar men ekıpaj músheleri eki kúnge oqshaýlanady. Osy aralyqta olardyń COVID-19 juqtyrǵan-juqtyrmaǵanyn anyqtaý maqsatynda zerthanalyq taldaý jasalady. Nátıjesi kelgennen keıin azamattar ózderiniń turǵylyqty jerlerine, úı karantınine jiberiledi», - dedi Rýslan Álishev.
Qazirgi tańda ushaqqa 92 bılet satylǵan.
Esterińizge salaıyq, buǵan deıin elimizdiń 9 qalasyna shetelden osylaısha qazaqstandyqtar mingen arnaıy reıster kelgen edi.
