Petropavl áýejaıynyń keleshegi qandaı bolmaq
PETROPAVL. KAZINFORM — Petropavldaǵy «Qyzyl-Jar» halyqaralyq áýejaıynyń jumysy turaqtanǵanymen, áli de shyǵynǵa jumys istep jatyr.
Soltústik Qazaqstan oblysy ákimdiginde jolaýshylar kóligi jáne avtomobıl joldary basqarmasynyń keńeıtilgen alqa otyrysy ótip, jergilikti áýejaıdyń jumysy da talqyǵa tústi.
«Qyzyl-Jar» halyqaralyq áýejaıynyń dırektory Abyl Kekilbaevtyń aıtýynsha, nysan joǵary standarttarǵa tolyq sáıkes keletinin resmı túrde rastap, 2027 jyldyń sońyna deıin jaramdylyq sertıfıkatyn aldy. Nátıjesinde ınfraqurylymdyq shekteýler alynyp, túngi reısterdi oryndaýǵa múmkindik berildi.
— Áýe kemelerin muzdanýǵa qarsy tolyqqandy óńdeý júıesi engizildi. Sonymen qatar, janarmaı quıý kesheni qalpyna keltirilip, halyqaralyq, onyń ishinde týrıstik reısterdi oryndaýǵa jol ashyldy. Áýejaıdyń qazir Boeing 767 jáne Airbus 330 sekildi iri áýe kemelerin qabyldaýǵa tehnıkalyq múmkindigi bar. Qazirgi tańda turaqty baǵyttarda Boeing 737 ushaqtary, sonyń ishinde MAX 9 modıfıkatsııasy sátti paıdalanylyp keledi, — dedi áýejaı dırektory.
Byltyr áýejaıdan 132 myń jolaýshy ushqan. Sońǵy úsh jylda turaqty ósim bar. Máselen 2024 jyly 117 myń adam áýejaı qyzmetine júgingen.
«Almaty — Petropavl» baǵyty boıynsha júkteme 80% joǵary deńgeıde saqtalyp otyr. Nátıjesinde bul baǵytty sýbsıdııalaý toqtatyldy.
— Degenmen, operatsııalyq kórsetkishterdiń jaqsarǵanyna qaramastan, 2025 jylǵy qarjylyq nátıje teris kúıinde qalyp otyr. 382 mln teńge tabysqa qaramastan, 82 mln teńge shyǵyn bar. Buǵan basty sebep — ushý qaýipsizdigi men avıatsııalyq qaýipsizdikti qamtamasyz etýge ketetin joǵary turaqty shyǵyndar. Bul talaptar reıster sanyna qaramastan mindetti túrde oryndalady. Óńirlik áýejaılardyń óz ereksheligi bar, tabys bazasy shekteýli. Al qaýipsizdik pen ınfraqurylymǵa qoıylatyn talaptar soǵan qaramastan barlyq jerde birdeı. Negizgi shyǵyndar personalǵa jáne áýejaıdy jyl boıy belgilengen normatıvtik talaptarǵa saı jaǵdaıda ustap turýǵa jumsalady. Mundaı nysandardyń qarjylyq turaqtylyǵy reıster qarqyndylyǵy artqan jáne avıatsııalyq emes tabys kózderi damyǵan jaǵdaıda qamtamasyz etiledi, — deıdi Abyl Kekilbaev.
Mamannyń aıtýynsha, kommýnaldyq menshiktegi nysandar ǵana memlekettik qoldaýǵa ıe. Qazirgi jaǵdaıda áýejaı sýbsıdııalaý talaptaryna formaldy túrde sáıkes kelmeıdi. Sondyqtan ony ishki resýrstar men ınvestor qarajaty esebinen damytý mindeti tur.
— Áýejaıdyń strategııalyq maqsaty — dotatsııalyq nysannan óńir synyń qozǵaýshy kúshine aınalý. Osyǵan baılanysty oblys ákimdiginiń áýejaıdy «Qazposhta» AQ jáne jeke ınvestorlarmen birlesken mýltımodaldy kólik-logıstıkalyq ortalyq jobasyna ıntegratsııalaý bastamasyn qoldaý mańyzdy. Joba poshta jáne júk aǵyndaryn shoǵyrlandyrýdy, e-commerce logıstıkasyn damytýdy jáne avıatsııalyq emes tabysty arttyrýdy kózdeıdi. Bul ınfraqurylym júktemesin kóbeıtip, qarjylyq turaqtylyqty nyǵaıtyp, jańa jumys oryndaryn ashýǵa múmkindik beredi, — deıdi Abyl Kekilbaev.
Jalpy alǵanda, áýejaı tehnıkalyq turǵydan tolyq jaramdy jáne zamanaýı áýe kemelerin qabyldaı alady.
Buǵan deıin Zaısanda salynyp jatqan áýejaı jazda iske qosylatynyn jazǵan edik.