Petropavl áýejaıy janynan jańa logıstıkalyq hab ashylady
PETROPAVL. KAZINFORM – Úkimet Petropavl qalasy áýejaıy mańynda «Qyzyljar» arnaıy ekonomıkalyq aımaǵynyń jańa sýbaımaǵyn qurý bastamasyn qoldady.
Soltústik Qazaqstan oblysy ákimdiginiń kásipkerlik jáne ındýstrııalyq-ınnovatsııalyq damý basqarmasynyń málimetinshe, bul másele 19 mamyr kúni Premer-mınıstr Oljas Bektenovtiń tóraǵalyǵymen ótken Úkimet otyrysynda qaraldy.
Joba Memleket basshysynyń elimizdiń kólik-tranzıttik áleýetin damytý jáne zamanaýı avıatsııalyq habtar qalyptastyrý jónindegi tapsyrmalaryn iske asyrý aıasynda qolǵa alynyp otyr.
Úkimet basshysy óz sózinde Prezıdent Qazaqstandy óńirdegi jetekshi avıatsııalyq habqa aınaldyrý, áýejaı ınfraqurylymyn jańǵyrtý jáne ınvestıtsııa tartýǵa qolaıly jaǵdaı jasaý mindetin qoıǵanyn atap ótti.
Petropavl qalasynyń áýejaıy bazasynda qurylatyn «Qyzyljar» arnaıy ekonomıkalyq aımaǵynyń №8 sýbaımaǵy zamanaýı kólik-logıstıkalyq ortalyqqa aınalmaq. Joba aıasynda qoıma ınfraqurylymyn damytý, ónimderdi óńdeý, eksporttyq logıstıka jáne halyqaralyq júk tasymalyn jetildirý kózdelip otyr.
Jańa sýbaımaq SQO-nyń ekonomıkalyq damýyna serpin berip, ınvestıtsııa tartýǵa, jańa jumys oryndaryn ashýǵa jáne óńirdiń tranzıttik áleýetin arttyrýǵa múmkindik beredi.
Basqarma mamandarynyń aıtýynsha, joba «Qyzyljar» arnaıy ekonomıkalyq aımaǵyn damytý jáne óńirdiń ınvestıtsııalyq tartymdylyǵyn kúsheıtý baǵytyndaǵy jumystar aıasynda júzege asyrylyp jatyr.
Buǵan deıin Petropavl áýejaıy júk áýe reısterin qabyldaýǵa, júkterdi qaıta tıeýge jáne logıstıkalyq qyzmetterdiń keń aýqymyn kórsetýge qaýqarly ekenin jazǵan edik.
