Petropavl áýejaıy óńirdiń negizgi mýltımodaldy logıstıkalyq habyna aınalmaq
PETROPAVL. KAZINFORM - Petropavl qalasynyń áýejaıyn óńirlik mýltımodaldy logıstıkalyq habqa aınaldyrý jobasy talqylandy.
Soltústik Qazaqstan oblysy ákimdiginiń málimetinshe, bul másele «Qazposhta» AQ Basqarma tóraǵasy Bekejan Jákeevpen ótken resmı kezdesý barysynda sóz boldy.
Jobany iske asyrýǵa óńirdiń geografııalyq ornalasýy qolaıly. Soltústik Qazaqstan oblysy Reseımen shekaralas ornalasqan, sondaı-aq Qazaqstandy Reseıdiń iri ónerkásiptik aımaqtary — Sibir men Oralmen baılanystyratyn negizgi kólik-logıstıkalyq baǵyttardyń toǵysynda tur. Bul Petropavldy óńiraralyq jáne halyqaralyq júk tasymalyn damytýda mańyzdy torapqa aınaldyrýǵa negiz.
Qazir Petropavl áýejaıy júk áýe reısterin qabyldaýǵa, júkterdi qaıta tıeýge jáne logıstıkalyq qyzmetterdiń keń aýqymyn kórsetýge qaýqarly. Sonymen qatar, termınaldyq jáne servıstik ınfraqurylymdy kezeń-kezeńimen damytý arqyly áýejaıdyń áleýetin tolyq ashý kózdelip otyr.
Mýltımodaldy logıstıkalyq habtyń qurylýy óńiraralyq jáne halyqaralyq saýda-ekonomıkalyq baılanystardy nyǵaıtyp, oblystyń eldegi negizgi logıstıkalyq ortalyqtardyń biri retindegi básekege qabilettiligin arttyrmaq. Bul joba jańa ınvestıtsııalar tartýǵa, jumys oryndaryn qurýǵa jáne óńir ekonomıkasynyń ósýine oń áser etedi.
Kezdesý barysynda Qazposhta basshylyǵy kompanııanyń óńirmen yntymaqtastyqty keńeıtýge múddeli ekenin atap ótti. Qazirgi ýaqytta jobany odan ári damytý úshin áleýetti ınvestorlardy tartý máselesi pysyqtalyp jatyr.
Buǵan deıin Astana áýejaıynyń basqarma tóraǵasy taǵaıyndalǵanyn jazǵan edik.