Petropavl ataýy ózgere me - oblys basshysynyń jaýaby
ASTANA. QazAqparat - Búgin Ortalyq komýnıkatsııalar qyzmetindegi brıfıngte Soltústik Qazaqstan oblysynyń ákimi Qumar Aqsaqalov Petropavl qalasynyń ataýy ózgeredi degen áńgimelerge sońǵy núkte qoıdy, dep habarlaıdy QazAqparat tilshisi.
«Petropavl qalasynyń da, oblystyń da ataýy ózgermeıdi. Bul áńgimelerdi bireýler aıtyp júr. Ony estip, bilip otyrmyn. Biraq, búgingi kúni qala ataýyn ózgertýge baǵyttalǵan júıeli jumystar júrgizilip jatqan joq. Oǵan áli erte dep esepteımin», - dedi Qumar Aqsaqalov BAQ ókilderiniń saýalyna oraı.
Aıta keteıik, Petropavl qalasynyń ataýyn Qyzyljar dep ózgertý týraly bastama osydan biraz jyl buryn kóterilgen bolatyn. Tipti, 2010 jyly Májilistiń bir top depýtaty sol kezdegi Premer-Mınıstr Kárim Másimovtiń atyna depýtattyq saýal joldap, onda Petropavl qalasyna ejelgi Qyzyljar ataýyn qaıtarý týraly máselege qozǵaý salýdy ótingen edi.
«Soltústik Qazaqstan oblysynyń ortalyǵy - Petropavl qalasyna ejelgi Qyzyljar ataýyn qaıtarý týraly máselege qozǵaý salýyńyzdy jáne ony Qazaqstan Respýblıkasynyń Prezıdenti N.Á.Nazarbaevtyń qaraýyna engizýińizdi suraımyz. Bul másele óz sheshimin tapqansha, kún tártibinen túspek emes. Ýaqyt osyny talap etip otyr. Sondyqtan erte me, kesh pe ony qaraýǵa týra keledi. Osyndaı halyq kópten kútken sheshim qoǵamymyzda túsinistik ahýaly qalyptasyp otyrǵan búgingi tańda qabyldansa, nur ústine nur bolar edi», - delingen edi depýtattardyń saýalynda.
