Petropavl ákimdigi tasqyn kezinde zardap shekkenderdi tamaqtandyrǵan kásipkerge 29 mln teńge qaryz

PETROPAVL. KAZINFORM — Petropavlda byltyrǵy tasqyn kezinde evakýatsııalyq pýnkt turǵyndaryn tamaqpen qamtyǵan kásipker ákimdikti sotqa berdi.

Soltústik Qazaqstan oblysynyń prokýratýrasynda bıznestiń máseleleri boıynsha keńes ótti. 

SQO kásipkerler palatasy baspasóz qyzmetiniń málimetinshe, jıynda kásipkerdiń ózine tıesili qarajatty ala almaı júrgendigi aıtyldy. Barlyq mindettemeniń oryndalýyna jáne jumystardyń oryndalǵandyǵy týraly qol qoıylǵan aktilerge qaramastan, kásipkerge qyzmeti úshin aqy tólenbegen. Óıtkeni kelisimshart qazynashylyq organdarynda tirkelmegen, saldarynan qujat jaramsyz bolyp otyr.

— 2024 jyly tótenshe jaǵdaı rejımi kezinde Petropavl qalasy ákiminiń apparaty evakýatsııalyq pýnktte sý tasqyny kezinde tamaqtandyrýdy qamtamasyz etý boıynsha kásipkermen shart jasasty. Kásipker sharttyń talaptaryn oryndady, oryndalǵan jumystardyń aktilerine qol qoıyldy, ıaǵnı tapsyrys berýshi qabyldady. Alaıda, kelisilgen merzimde tólem jasalmady, alashaǵy 29 mln teńgeden asady. Kásipker sotqa júginýge májbúr boldy, — deıdi SQO Kásipkerler palatasynyń bólim bastyǵy Aıdos Keńbeıilov.

Mamannyń aıtýynsha, memlekettik organdar tarapynan atqarylǵan jumys úshin aqsha tólemeý jaǵdaılary artqan. Bul isterdiń kópshiligi ótken jylǵy kóktemgi sý tasqyny kezinde jasalǵan kelisimsharttarǵa qatysty.

Oryndalǵan jumystardyń dálelderine qaramastan, sot kásipkerge talapty qanaǵattandyrýdan bas tartty. 

— Sotta jasalǵan kelisimshartty ákim apparaty qazynashylyq organdarda tirkemegeni anyqtaldy, bul zańnamaǵa sáıkes ony jaramsyz etedi. Bul jerde suraq týyndaıdy: nege memlekettik organ tirkelmegen sharttyń zańdyq kúshi joq ekenin bile tura kásipkerden jumystardy qabyldady jáne oryndalýyn talap etti? Bul oqıǵa jekelegen memlekettik qurylymdardyń jaýapsyzdyǵyn kórsetedi jáne bızneske kedergi keltiredi, — deıdi Aıdos Keńbeıilov.

Osyndaı oqıǵalardyń jıileýine baılanysty SQO Kásipkerler palatasynyń zańgerleri kelisimsharttardyń somasy 100 AEK-ten asqan jaǵdaıda kásipkerlerge qazynashylyq organdarynda tirkelýin aldyn ala tekserýge keńes beredi. Bul kelisimsharttyń jaramsyzdyǵyna baılanysty tólem jasaýdan bas tartý sııaqty jaǵymsyz jaǵdaılardy boldyrmaýǵa kómektesedi. Oblys prokýratýrasy bul máseleni anyqtaýǵa ýáde etti.

Buǵan deıin SQO-da 400-ge jýyq adamǵa spırttik ishimdik ishýge tyıym salynǵanyn jazdyq.