Petropavl ákimdigi qymbat kilemder satyp almaq bolǵan
Soltústik Qazaqstan oblysynda memlekettik satyp alý protsedýralaryna júrgizilgen monıtorıngten keıin bıýdjettiń 1,826 mlrd teńgesi únemdeldi, dep habarlaıdy Kazinform.
QR Sybaılas jemqorlyqqa qarsy is-qımyl agenttiginiń SQO boıynsha departamenti ótken toǵyz aıdaǵy jumysyn qorytyndylady. Vedomstvo basshysy Ashat Djakıpbekovtyń aıtýynsha, Ekonomıkalyq zertteýler ınstıtýty júrgizgen jalpyulttyq zertteýdiń nátıjesi boıynsha oblys sybaılas jemqorlyq deńgeıi tómen óńirlerdiń qatarynda. Desek de, sheshimin kútken másele áli de barshylyq.
«SQO-nyń erekshelikteri eskerilip, sybaılas jemqorlyq táýekelderi kartasy jasaldy. Departament osy kartany negizge ala otyryp jumys isteıdi.
Kartaǵa engen áleýmettik máseleler monıtorıng jáne syrtqy taldaýlar boıynsha qarastyrylady. Ótken 9 aıda óńirde sybaılas jemqorlyqqa qarsy 8 monıtorıng júrgizildi. 5 memlekettik organǵa jáne bir kvazımemlekettik sektor mekemesine syrtqy taldaý júrgizildi. Memlekettik organdarǵa 200-den astam usynym berildi», – deıdi Ashat Djakıpbekov.
Departament basshysynyń aıtýynsha, memlekettik satyp alý júıesine kúndelikti monıtorıng júrgiziledi. Negizgi mindet – josparlaý kezeńinde taýarlardyń qunyn jasandy túrde kóterýdiń aldyn alý.
«Nátıjesinde bıylǵy 9 aıda josparlanǵan satyp alý baǵasyn kóterýdiń 79 faktisi anyqtaldy. Olar boıynsha memlekettik 45 organ baǵany tómendetý boıynsha sharalar qabyldady. Bıýdjettiń 1,826 mlrd teńgesi únemdeldi.
Mysaly, Petropavl qalasy ákiminiń apparaty kilemderdiń sharshy metrine 35 myń teńge tóleýdi josparlaǵan. Sybaılas jemqorlyqqa qarsy qyzmet arlasqannan keıin satyp alý baǵasyn qaıta qarady. 7,8 mln teńge bıýdjet qarajatyn tıimsiz paıdalanýǵa jol berilmedi», – deıdi Ashat Djakıpbekov.
