Petropavl ákimine eskertý jasaldy
PETROPAVL. QazAqparat - Petropavl qalasynyń ákimine qatysty qyzmettik tergeý júrgizildi, dep habarlaıdy QazAqparat tilshisi.
Soltústik Qazaqstan oblystyq Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Ǵalym Tursynbaevtyń aıtýynsha, qyzmettik tergeý barysynda sheneýniktiń qyzmettik etıkany buzǵany belgili bolǵan.
«Qala ákimi Marat Tasmaǵambetovti shaqyrtýǵa týra keldi. Ol ádepsiz qylyq kórsetkenin moıyndady. Oblys ákimi apparatynan M. Tasmaǵambetovke eskertý jasalǵany týraly jaýap keldi. Memlekettik qyzmetkerdi bir áreketti eki márte qaıtalaǵany úshin jazalaı berýge bolmaıdy. Tekseris ótkizildi. Bul másele Etıka keńesinde talqylanbaıtyn boldy, sebebi sheneýnik áldeqashan jazasyn alǵan» , - dedi Ǵ. Tursynbaev.
Eske sala keteıik, atalmysh másele tóńireginde tergeý júrgizýge uıaly telefonda túsirilgen vıdeo sebep bolǵan. Onda qala basshysy uzaq ýaqyt boıy botanıkalyq baqty basqarǵan Qazaqstanǵa eńbegi sińgen agronom Ravıl Rıazapovpen dóreki sóılesip turǵany kórinedi. Olar oranjereıany qaıta qalpyna keltirý máselesi boıynsha kelispeı qalǵan.
Qalanyń qurmetti azamaty men ákimniń arasyndaǵy kıkiljińdi kezdesýge qatysqandardyń biri uıaly telefonyna túsirip alǵan.
