Petropavl ákimi jylytý maýsymyndaǵy negizgi máselelerdi atady
Petropavl qalasynyń qysqy jylytý maýsymyna ázirligi jóninde esep bergen qala ákimi Rýslan Anbaevtyń aıtýynsha, ortalyq jylýmen jabdyqtaý júıesine shaharda 4,5 myń ǵımarat qosylǵan.
Jylý energııasymen turmystyq sektordyń 71 myń abonenti jáne 2,3 myń zańdy tulǵa qamtylǵan.
«Petropavlda ortalyq jylý júıesine qosylǵan 1115 kóp páterli baspana bar. Qazirgi ýaqytta jylý qabyldaýǵa tehnıkalyq turǵydan 430 úı daıyn. Eshqandaı basqarý nysany joq 52 úı bar. Biz olarǵa tekserý júrgizdik, munda sońǵy 2-3 jylda júıeli túrde gıdravlıkalyq synaq jáne jylý júıesin jýý júrgizilmegeni anyqtaldy. Negizinen bul 1914 jyldan 1960 jylǵa deıin salynǵan 2 qabatty turǵyn úıler. Bul úılerde jylýmen jabdyqtaý júıesine kúrdeli jóndeý júrgizilmegen, al jylý júıesi tikeleı jylý qubyryna qosylǵan. Saldarynan jylý júıesin jýyp-shaıýdy qıyndatady. Qazir turǵyndarmen kezdesýler ótkizilip jatyr. Jylytý maýsymyna daıyndyq menshik ıeleriniń mindeti ekenin eske salǵym keledi», - deıdi Rýslan Anbaev.
Qala ákiminiń aıtýynsha, ótken jyldyń jylytý maýsymynda baspanalardaǵy páterlerdiń sýyq bolýynyń birneshe sebebi anyqtalǵan.
«Páterleriniń sýyq ekendigine shaǵymdanǵan 137 ótinishtiń 14 jaǵdaıynda ol úıler jazda jylý berý maýsymyna daıyndyqtan ótpegen. 77 jaǵdaıda páterlerdegi jáne jertólelelerdegi jylytý júıesiniń bastapqy jobasy ózgertilgen. Osyǵan baılanysty «Petropavl jylý jelileri» JShS qyzmetkerlerine, páter ıeleri jáne múlik ıeleri birlestigi men jaı seriktestikter tóraǵalaryna anyqtalǵan buzýshylyqtardy joıý boıynsha uıǵarymdar berildi. Taǵy 46 ótinish - ishki jelilerdegi zaqymdarǵa qatysty tústi. Negizgi sebep - jylý jelileriniń tozýyna jáne olardy aýystyrý boıynsha jyl saıynǵy oryndalatyn jumystar kóleminiń jetkiliksizdigine baılanysty», - deıdi qala ákimi.
Petropavlda kúrdeli jáne aǵymdaǵy jóndeý jumystary aıasynda bıyl 6,3 km jylý jelilerin aýystyrý jumystary júrgizilip jatyr.
