Petropavl ákimdiginiń kommýnaldyq kásiporny kásipkerlerge 400 mln teńge qaryz
Soltústik Qazaqstan oblysyna kelgen bıznes-ombýdsmen Rýstam Júrsinov kásipkerler palatasynda jeke qabyldaý ótkizdi. Jeke kásipker Murat Karbýzov jeke kásipkerlerdiń quqyqtaryn qorǵaý jónindegi ýákilge «Kommýnhoz» MKK-ǵa qatysty shaǵymdandy. Kásiporyn óziniń sharttyq mindettemelerin oryndamaǵan. Ótken jyldyń naýryz aıynda kásipker men «Petropavl qalasy ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi» KMM «Kommýnhoz» MKK arasynda beınebaqylaý qyzmetterin usyný týraly shart jasaldy.
«Bizdiń kásiporyn beınebaqylaý qyzmetterin usynýmen aınalysady. «Kommýnhoz» sońǵy alty aıda oryndalǵan jumys úshin aqy tólemeı otyr. Mekemeniń bereshegi - 2 mln 160 myń teńge. Meniń ótinishime turǵyn úı-kommýnaldyq sharýashylyǵy bólimi aqsha bólinbeı jatyr dep jaýap berdi», - dedi Murat Karbýzov.
SQO Kásipkerler palatasy dırektorynyń orynbasary Jeńis Qazıevtiń aıtýynsha, «Kommýnhoz» MKK-ǵa shaǵymdanýshylar jetip artylady.
«Búgingi tańda kommýnaldyq memlekettik kásiporynǵa qatysty 18 atqarýshylyq is qozǵaldy, bıznes sýbektileri aldyndaǵy jalpy qaryzy 400 mln teńgeden asady, ıaǵnı bul birli-jarym jaǵdaı emes. Jergilikti atqarýshy organǵa paıda bolǵan bereshekti óteý úshin qarajat bólýdi qamtamasyz etýde járdem kórsete alamyz jáne naqty osy jaǵdaı boıynsha sot tártibimen nemese notarıýstyń atqarýshylyq jazbasyn jasaý arqyly bereshekti óndirip alý boıynsha járdem kórsetýge daıynbyz», - dedi Jeńis Qazıev.
Qabyldaýǵa qatysqan SQO Kásipkerlik jáne ındýstrııalyq-ınnovatsııalyq damý basqarmasynyń basshysy Darhan Ámrın bul máseleni birneshe kásipker kótergenin, másele zańnama aıasynda sot tártibimen sheshiletindigin aıtty. Basqarma ókiliniń aıtýynsha, qaryzdardyń basym bóligi joldardy qysqy kútip ustaý boıynsha qalyptasqan.
«Bizdiń mindetimiz sot sheshimin shyǵarý emes. Birneshe mıllıon teńge qaryzy bar «Kommýnhoz» osy ýaqytqa deıin qalaı kelisimshart jasasyp kelgenin túsine alar emespin. Demek, ol qaryzǵa batqan ústine batyp jatyr», - dedi Qazaqstan kásipkerleriniń quqyqtaryn qorǵaý jónindegi ýákil Rýstam Júrsinov.
Bıznes-ombýdsmen jergilikti atqarýshy organdar men bıýdjet komıssııasyna bıýdjetti kezekti túzetýdi qaraý kezinde kásipkerler aldyndaǵy 400 mln teńge mólsherindegi bereshekti óteýge qarajat qarastyrýdy usyndy. Al kásipkerler palatasy men SQO boıynsha ombýdsmen keńsesine bereshekti óndirip alý boıynsha sot óndirisin bastaý, osyndaı ótinishterge taldaý júrgizý jáne bıýdjet komıssııasynyń qarajat bólý máselesin baqylaý tapsyryldy.
