Petropavl ákimdiginiń bólim basshysy 150 myń teńge para aldy degen kúdikke ilindi

PETROPAVL. QazAqparat – Soltústik Qazaqstan oblysy Sybaılas jemqorlyqqa qarsy qyzmet Petropavl qalasy ákimdiginiń Kásipkerlik, aýyl sharýashylyǵy jáne veterınarııa bólimi basshysyn para aldy degen kúdikpen ustady, dep habarlaıdy QazAqparat tilshisi.

Sybaılas jemqorlyqqa qarsy is-qımyl Agenttiginiń SQO boıynsha departamentiniń málimetinshe, Petropavl qalasy ákimdiginiń Kásipkerlik, aýyl sharýashylyǵy jáne veterınarııa bóliminiń basshysy kúzet agenttikteriniń biriniń dırektorynan 150 myń teńge kóleminde para aldy degen kúdikke ilindi. Laýazymdy tulǵa bul somany memlekettik satyp alý shartyna sáıkes memlekettik nysandardyń birin kúzetý boıynsha oryndalǵan jumystardyń aktilerine kedergisiz qol qoıǵany úshin alǵan.

Mamandardyń aıtýynsha, Sotqa deıingi tergep-tekserýdiń mán-jaıy tergeý múddesinde jarııa etilmeıdi.

Kúdiktilerge qatysty túpkilikti sheshimdi olardyń kinásiniń dárejesin anyqtaı otyryp, sot shyǵarady.