Petropavl ákimdigine qarasty kásiporyn SQO kásipkerlerine 1 mlrd teńgege jýyq qaryz
Soltústik Qazaqstan oblysynyń kásipkerleri Petropavl qalalyq ákimdik janyndaǵy «Kommýnhoz» kásipornynan qaryzyn qaıtara almaı júr.
2021 jyly olar merdiger uıymmen kommýnaldyq jumystardy atqarýǵa kelisimge otyrǵan.
Olar óz mindetin tolyq oryndaǵan, buǵan atqarylǵan jumystardyq qabyldanyp alynǵan jónindegi qujattar dálel.
Alaıda kommýnaldyq mekeme 27 kásipkerge qordalanǵan qaryz – 1 mlrd jýyq teńgeni tóleýge asyǵar emes.
Búgin tyǵyryqqa tirelgen 18 kásipker Memleket basshysyna úndeý jasap, kómek surady.
Óıtkeni sot olardyń aryzyn qanaǵattandyrǵanymen nátıje bolmaǵan. «Kommýnhozdyń» shottary buǵattaýly, bereshekti qaıtaratyn aqshalary joq.
«Gaısına» jeke kásipkerliginiń jetekshisi Tamara Gaısınanyń aıtýynsha, eki jyl buryn kásipker konkýrsty utyp alyp, jaǵajaıǵa 100 kóshet otyrǵyzǵan.
Bir jyl boıy ony kútip-baptaǵan. Sol eńbekaqysyn áli ala almaı júr.
«Jumysty qalalyq ákimdik pen «Kommýnhoz» kásiporny qabyldady. Kelisimshart boıynsha tapsyrys berýshi 65 mln teńge tóleýi kerek edi. Aqy qolǵa tolyq tımedi. Sotqa berdik, nátıje joq», - deıdi Tamara Gaısına.
«Barar jeri, basar taýy» qalmaǵan kásipkerler Prezıdentten máseleni sheship berýdi surady.
Óıtkeni, olar jumysshylaryna eńbekaqy tóleı almaı jatyr, kópshiliginiń nesıesi bar, qaryzdyń saldarynan salyq, áleýmettik tólemder, kommýnaldyq qyzmet boıynsha bereshek paıda bolǵan.
Kópshiligi bankrottyqtyń az-aq aldynda tur.
«Ol qarjyny tóleý úshin «Kommýnhoz» kommýnaldyq mekemesi qalalyq turǵyn úı-kommýnaldyq sharýashylyǵy bólimin sotqa berýi kerek. Sottyń sheshimi bolsa, bıýdjette qarjy bar. Sol aqsha bólinip, «Kommýnhozǵa» tólenip, barlyq qaryz jabylady», - deıdi másele boıynsha túsinik bergen Petropavl qalasy ákiminiń orynbasary Asqar Habıbýlın.
