Petropavl ákimdigi zırattarǵa qyzmet kórsetetin kompanııamen sottasyp jatyr
ASTANA. QazAqparat - Petropavl qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi zırattarǵa qyzmet kórsetetin kompanııamen aradaǵy kelisimsharttyń kúshin sot arqyly joımaq, dep habarlaıdy QazAqparat tilshisi.
Qalalyq bólimniń málimetinshe,bıylǵy konkýrsta qalalyq zıratty kútip ustaý jáne qyzmet kórsetýdi «Prıhodchenko» JK utyp alǵan. Alaıda kompanııa kelisimshartta kórsetilgen mindettemelerin atap aıtqanda qorymdaǵy qoqystardy shyǵarý, shóbin shabýdy oryndamaǵan. Sondaı-aq qadaǵalaýshy jáne kúzetshi sekildi qyzmetker qoımaǵan.
«Turǵyndar tarapynan kóptegen shaǵymdar kelip túskeni jáne «Prıhodchenko» JK-nyń moınyna alǵan mindettemelerdi oryndamaǵany úshin sotqa kelisimsharttyń kúshin joıý jóninde talap-aryz berildi», - dep málim etti qalalyq bólimdegiler.
Bıylǵy jyly jerleý oryndaryn kútip ustaý úshin qalalyq bıýdjetten 24 mıllıon teńge bólindi. Belgisiz jaǵdaıda kóz jumǵandardy máıithana jetký úshin táýlik boıy kezekshilik qurý, zırat aýmaǵyn qorshaý, týystary joq nemese belgisiz jandardyń máıitterin jerleý, qorymdy kútip ustaý jáne sanıtarlyq tazalaý jumystary atalǵan qarjynyń ishinde qarastyrylǵan.
Sońǵy 3 jylda Petropavldaǵy zırattardy kútip ustaýǵa bólinetin qarjy kólemi 17,8 mıllıonnan 24 mıllıonǵa deıin artty.
