Petropavl ákimdigi: Tóbesi opyrylyp túsken mádenıet úıin jóndeýge konkýrs jarııalandy
PETROPAVL. QazAqparat – Petropavldaǵy tóbesi opyrylǵan mádenıet úıin jóndeýge 108 mln teńge kerek, dep habarlaıdy QazAqparat tilshisi.
Petropavl qalasy ákiminiń orynbasary Asqar Habıbýlın tóbesi qulaǵan mádenıet úıine qatysty túsinik berdi.
«24 aqpan kúni qalalyq mádenıet úıiniń kórermender zalynda tóbeniń ishki jaǵy opyrylyp tústi. Eski tireýishter shydas bermegen. Saldarynan 500 sharshy metr aýmaq zaqymdaldy. Nysan jabyq tur, ǵımaratta kúzetshiden basqa eshkim joq.
Byltyr maýsym aıynda tóbeni ustap turǵan bes tireýish maıysyp, mádenıet úıin tolyq jabýǵa týra keldi. Ol kezde de balalar bolǵan joq, eshkim zardap shekpedi. Tıisti saraptama júrgizildi. Jyldyń sońynda osy nysanǵa qatysty jobalyq-smetalyq qujattar ázirlendi. Ǵımaratty jóndeý jáne qalpyna keltirý jumystaryna 108 mln teńge qajet. Qazir jóndeý jumystaryn júrgizýge konkýrs jarııalandy. Naýryz aıynda qorytyndysy shyǵarylady», - dedi qala ákiminiń orynbasary.
Mádenıet úıinde ártisterden basqa 501 bala túrli úıirmelerge qatysyp kelgen. Úıirmeler basqa memlekettik mekemelerge ýaqytsha ornalastyryldy. Keı kásipkerlermen jalǵa alý boıynsha kelisimder jasaldy.
Buǵan deıin Petropavldaǵy mádenıet úıi tóbesiniń opyrylyp túskenin aıtqan edik.
