Petropavl 2-JEO «qyzyl» aımaqtan «sary» aımaqqa aýystyryldy
ASTANA. KAZINFORM – Petropavl 2-JEO QR Energetıka mınıstrliginiń táýekelder kartasyndaǵy «qyzyl» aımaqtan turaqty «sary» aımaqqa resmı túrde aýystyryldy. Bul týraly («SEVKAZENERGO» AQ habarlady.
Soltústik Qazaqstan oblysynyń negizgi energııa kózi sanalatyn stantsııanyń mártebesin ózgertý júıeli jańǵyrtý jumystary, ınvestıtsııalar kóleminiń artýy jáne personaldy daıarlaýdyń zamanaýı tásilderin engizý nátıjesinde múmkin bolǵan.
Kompanııa málimetinshe, tehnologııalyq buzylýlar sany 55-ten 23-ke deıin qysqarǵan.
– Qol jetkizilgen nátıjeler – júıeli tásildiń tikeleı saldary. Biraq toqtaýǵa bolmaıdy. Mindetterdiń kókjıegi men kólemi tolyq túsinikti, stantsııadaǵy ózgerister aıqyn, al «sary» aımaqqa aýysý tańdalǵan baǵyttyń durystyǵyn dáleldeıdi, – dep atap ótti Ortalyq-Azııa Elektroenergetıkalyq korporatsııasy basqarma tóraǵasy Baǵdat Oral.
2026 jyly SEVKAZENERGO kompanııasy Petropavl 2-JEO-ny jóndeý men keshendi jańǵyrtýǵa 20 mlrd teńgeden astam qarjy baǵyttaıdy. Joba tolyqtaı kompanııanyń óz qarajaty esebinen qarjylandyrylady.
Investıtsııalyq jospar aıasynda №2 qazandyq agregatyn qaıta qurý, bes qazandyq agregaty men bir týrboagregatty kúrdeli jóndeý, jańa gaz ótkizgishter salý jáne stantsııa kesheniniń ǵımarattary men qurylystaryn jańartý kózdelgen.
Sonymen qatar 2027 jyly №3 tútin murjasyn qaıta jańǵyrtý aıaqtalady dep josparlanyp otyr.
Stantsııada kadr daıarlaý júıesi de jańartylǵan. Qazirgi ýaqytta Petropavl 2-JEO-da Power Plant Simulator baǵdarlamasynyń alǵashqy kezeńi – stantsııanyń tolyqqandy «tsıfrlyq egizi» engizilgen. Vırtýaldy sımýlıator qyzmetkerlerge apattyq jaǵdaılardy qaýipsiz ortada pysyqtaýǵa múmkindik beredi.
Budan bólek, kásiporynda qaýipsizdikti baqylaýdyń úsh satyly júıesi engizilgen.
Kompanııa ókilderiniń aıtýynsha, bul tásil yqtımal buzýshylyqtardy aldyn ala anyqtap, olardyń saldaryn boldyrmaıdy.
Sondaı-aq sońǵy jyldary baıqalǵan bilikti mamandardyń jappaı jumystan ketý úrdisin toqtatý múmkin bolǵan.
– 2-JEO jabdyqtaryn jańǵyrtý tutynýshylarǵa energııa jetkizý ınfraqurylymyn jańartýmen qatar júrýi tıis, – dedi Baǵdat Oral.
Aıta keteıik, buǵan deıin Petropavl JEO-2-de zııandy shyǵaryndylar 3,5 esege azaıǵany habarlandy.
