Petropalda ury aýyr qondyrǵylardy júk tıegishpen áketip otyrǵan
PETROPAVL. QazAqparat - Petropavlda vıdeobaqylaý kameralary arqyly ury qoldy etken zattarnyń qoldy etken zatyn salyp alyp ketken kólik tabyldy, dep habarlaıdy QazAqparat tilshisi.
SQO ІІD baspasóz qyzmetiniń aqparatyna qaraǵanda, shına montajdaý sheberhanasynan urlanǵan, 1,6 mıllıon teńgeniń qondyrǵysy kameraǵa túspegen. Biraq qondyrǵy ıesiniń shaǵymynan keıin polıtseıler kimdi izdeý kerektigin birden túsingen.
«Kúdiktilerdiń biri frontaldyq júk tıegishtiń júrgizýshisi bolyp jumys istegen. Kúdikti urlyq jasaý úshin osy mashınany paıdalanǵan. Júk kóliginiń shómishine mehanıkalyq qondyrǵylardy toltyryp alyp, túngi qala kóshelerimen kele jatqan mashınany birden birneshe kamera túsirip alǵan. Tergeý nusqasy boıynsha, urlyqty Petropavldyń 1986 jáne 1994 jyly týǵan eki turǵyny jasaǵan. Olar sotta jaýapqa tartylyp, úsh jylǵa bas bostandyqtarynan aıyryldy», - deıdi baspasóz qyzmetiniń ókilderi.
Jedel basqarý ortalyǵynyń operatorlary qylmystardy der kezinde ashýǵa jıi septigin tıgizýde. Máselen, úıdiń kireberisinde 67 jastaǵy petropavldyqqa shabýyldaǵan qaraqshy da osylaı ustalǵan. Budan bólek, urlandy dep aryz túsken «Toıotany» operatorlar kóp mashınanyń ishinen birden tanyǵan.
«Kameralardyń kóbeıýine baılanysty anyqtalǵan quqyqbuzýshylyqtar sany da artyp otyr. Jyl basynan beri qaladaǵy kameralar 4,4 myń ákimshilik quqyqbuzýshylyqty tirkedi. Al byltyrǵy alǵashqy toqsanda bul kórsetkish 3,3 myń edi. Qyraǵy operatorlar 41 qylmysty ashýǵa kómektesti. Bul da 2017 jyldyń alǵashqy úsh aıyna qaraǵanda 12% kóp», - deıdi Petropavl ІІD JDB bastyǵynyń orynbasary Baqytjan Álibekov.
Búgingi tańda Petropavl kóshelerinde 410 kamera jumys istep tur.
