Qazaqstanda PET/KT zertteýlerin kútý ýaqyty 3–12 aıdan 14 kúnge deıin qysqardy
ASTANA. KAZINFORM – 2026 jyldyń birinshi toqsanynda PET/KT zertteýlerine patsıentterdi jazý boıynsha Biryńǵaı respýblıkalyq úılestirý ortalyǵy (BRÚO) 18 myńnan astam qońyraý qabyldady.
Ulttyq ǵylymı densaýlyq saqtaýdy damytý ortalyǵynyń habarlaýynsha, osy kezeńde 13,9 myńnan astam zertteýge joldama berildi.
BRÚO joǵary tehnologııalyq dıagnostıkalyq qyzmetterge teń jáne qoljetimdilikti qamtamasyz etý maqsatynda qurylǵan. Ortalyq iske qosylǵannan beri zertteýlerdi kútý ýaqyty 3–12 aıdan 14 kúnge deıin qysqardy. Bul ortalyq qyzmetine degen suranystyń joǵary ekenin jáne úılestirý júıesiniń tıimdiligin kórsetedi.
Ortalyq jumysy «bir tereze» qaǵıdaty boıynsha uıymdastyrylǵan. Mamandar elektrondyq kezekti basqarady, jabdyqtardyń júktemesin baqylaıdy jáne Qazaqstandaǵy medıtsınalyq uıymdardyń ózara áreketin úılestiredi. Bul tásil protsesterdiń ashyqtyǵyn arttyryp, patsıentterge turatyn óńirine qaramastan teń qoljetimdilikti qamtamasyz etedi.
Júıege medıtsınalyq-sanıtarııalyq alǵashqy kómek uıymdary, onkologııalyq ortalyqtar jáne PET/KT zertteýlerin júrgizetin 12 medıtsınalyq uıym qosylǵan.
Bir operatorǵa ortasha eseppen kúnine 150 qońyraý túsedi, bul ortalyqtyń jumys kólemi men qarqyndylyǵyn kórsetedi.
PET/KT zertteýleri mindetti áleýmettik medıtsınalyq saqtandyrý júıesi aıasynda tegin medıtsınalyq kómektiń kepildik berilgen kólemine kiredi. Joldama bolǵan jaǵdaıda zertteý patsıentterge aqysyz júrgiziledi.
PET/KT – aýrý úderisterin molekýlalyq deńgeıde anyqtaýǵa, aýrýdyń taralýyn baǵalaýǵa jáne emniń tıimdiligin qadaǵalaýǵa múmkindik beretin zamanaýı dıagnostıkalyq ádis. Bul tehnologııa onkologııalyq naýqastar úshin mańyzdy, sebebi ýaqtyly dıagnostıka terapııa nátıjesine áser etedi.
Aıta keteıik, buǵan deıin onkologııany erte kezeńde anyqtaý 35 paıyzǵa deıin óskenin jazǵan edik.
