Petıtsııa: qazaqstandyqtar MÁMS júıesin ózgertýdi talap etti
ASTANA. KAZINFORM – Bir top qazaqstandyq Densaýlyq saqtaý mınıstrliginen Parlamenttiń qaraýyna mindetti áleýmettik medıtsınalyq saqtandyrýǵa qatysty quqyqtyq aktilerge ózgerister men tolyqtyrýlar engizýdi surap petıtsııa jarııalady.
«Mindetti áleýmettik medıtsınalyq saqtandyrý boıynsha jarnalardy tek bir kiris kózinen esepteýdi (ustap qalýdy) jáne aýdarýdy qoldaný. Azamattardyń medıtsınalyq saqtandyrýyn jabý úshin bir tabys kózi jetkilikti dep sanaımyz. Óıtkeni, kóptegen azamat MÁMS júıesi sheńberinde medıtsınalyq qyzmetterdi paıdalanbaıdy, al jarnalar bosqa kúıip ketedi. Eger azamat belgili bir ýaqyttyń ishinde medıtsınalyq qyzmetti shartty túrde almasa, MÁMS jarnasy qaıtarylmaıdy jáne jınaqtalmaıdy. Jarna jınaqtalmaǵandyqtan jáne qaıtarylmaǵandyqtan, biz birneshe kózden esepteýler men aýdarym jasaý kerek emes dep sanaımyz», - dep túsindirilgen petıtsııa mátininde.
Sondaı-aq, otandastarymyz jeke kásipkerlerdi kúntizbelik aı ishinde tabys tappasa, MÁMS júıesine jarna aýdarý mindetinen bosatýdy surap otyr. Oǵan negiz, jeke kásipkerdiń aı ishinde kirisi bolmasa, sáıkesinshe MÁMS jarnasyn aýdarýǵa múmkindigi joq.
«Azamattarǵa MÁMS júıesinde jınalǵan jarnalardyń bir bóligin jaqyn týystaryna berý múmkindigin qarastyrý. MÁMS júıesi barlyq medıtsınalyq qyzmetterdi qamtymaıdy. Jarnalar boıynsha jınaqtalǵan derekter azamattarǵa qandaı medıtsınalyq qyzmetterge jumsaý kerektigin óz betinshe sheshýge, sonymen qatar emge muqtaj jaqyn týystaryna berýge múmkindik beredi. MÁMS júıesine qatysty qoǵam narazylyǵy men memlekettik aýdıtpen anyqtalǵan mıllıardtaǵan zań buzýshylyqtardy eskere otyryp, bul júıe joǵaryda atalǵan máselelerdi qaraý arqyly azamattardyń tynys-tirshiligin jaqsartý bóliginde túbegeıli ózgeristerdi qajet etedi», - delingen petıtsııada.
