Petıtsııany kópshilik talqysyna shyǵarý úshin qansha daýys jınaý kerek

ASTANA. QazAqparat – Májiliste ótken dóńgelek ústel otyrysynda «Qoǵamdyq baqylaý týraly» Zań jobasyn tanystyrǵan Aqparat jáne qoǵamdyq damý vıtse-mınıstri Danııar Qadyrov petıtsııany kópshilik talqysyna shyǵarý úshin qansha daýys jınaý kerektigin aıtty, dep habarlaıdy QazAqparat tilshisi.

«Petıtsııa avtory ótinish bergen kúnnen bastap 20 kún ishinde Qazaqstan Respýblıkasynyń keminde 150 azamatyn petıtsııaǵa qosylýyn qamtamasyz etýi qajet.

Petıtsııalar ınstıtýty qurylǵan birqatar elderde qoltańbalardyń belgili bir sanyn jınaǵannan keıin petıtsııalar kópshilikke qoljetimdi bolady. Osyndaı irikteý ornatý arqyly qoǵamnyń qyzyǵýyn týdyrmaǵan usynystardy qarastyrmaýǵa bolady», - dedi Danııar Qadyrov.

Zań jobasynda talaptarǵa sáıkes keletin petıtsııalardy quzyretti memlekettik organ 3 jumys kúni ishinde qol jınaý úshin ınternet resýrsqa ornalastyratyny aıtylǵan.

«Ár azamat petıtsııaǵa qosylý jáne ınternet resýrsta pikir qaldyrý arqyly oǵan óz ustanymyn jarııa ete alady. Shekti mánge jetpegen petıtsııa quzyreti boıynsha tıisti memlekettik organǵa, jergilikti ókildi jáne atqarýshy organǵa jiberiledi. Sondaı-aq, Ákimshilik rásimdik-protsestik kodekste belgilengen tártippen jeke habarlama, ún qosý nemeses usynys retinde qarastyrylady.

Ákimshilik rásimdik-protsestik kodekste qaralýǵa tıis kelesi shekti mánderdi bekitý kózdelip otyr. Aýdandyq jáne oblystyq mańyzy bar qalalardyń jergilikti atqarýshy organdarynyń quzyretine jatatyn máseleler boıynsha halyq sany 50 myńnan asatyn bolsa, 2,5 myń daýys jınaý qajet. 50 myńnan tómen bolsa, onda aýdan halqynyń 5 paıyzynyń daýysy qamtamasyz etilýi kerek», - dedi vıtse-mınıstr.

Al aýyldyq ókildi organdar, máslıhattar boıynsha qaralatyn suraqtar ondaǵy halyq sany 50 myńnan asatyn bolsa, 5 myń daýys jınalýy qajet. 50 myńnan tómen bolsa, halyq sanynyń 10 paıyzynan tómen bolmaýy kerek.

«Oblystyq, respýblıkalyq mańyzy bar qalalardyń ákimdikteriniń quzyretine jatatyn máseler boıynsha ákimshilik birlikte turatyn halyq sanynyń 1 paıyzy daýys berýi kerek. Oblystyq, respýblıkalyq mańyzy bar qalalardyń máslıhattarynyń quzyreti boıynsha halyq sanynyń 2 paıyzynan kem emes daýys jınalýy tıis.

QR Úkimetiniń quzyretine jatatyn máseler boıynsha el azamattarynyń 50 myń daýsy bolýy kerek», - dedi mınıstrdiń orynbasary.