Peterbordaǵy kóshelerdiń birine Vıktor Tsoı esimi berilýi múmkin
ASTANA. 31 mamyr. QazAqparat - Sankt-Peterbordyń gýbernatory Georgıı Poltavchenko qalalyq belsendilerdiń soltústik astananyń birine ataqty lenıngradtyq rok-mýzykant Vıktor Tsoıdyń esimin berý týraly bastamalaryna oń kózqaras tanytty.
Bul týraly Eýrazııa birinshi arnasy habarlaıdy.
Bıyl mýzykant, kózi tiri bolǵanda, 50 jasqa tolatyn edi. Tsoı 1990 jyldyń 15 tamyzynda Rıgadan birneshe shaqyrym jerde jol apatynan qaıtys boldy.RIA Novostı habarlaǵandaı, resmı nusqaǵa saı, ol joldyń ústinde kózi ilinip ketken kórinedi.
«Ideıa maǵan unaıdy, jetildirý kerek...» - dep Twitter-degi shaǵyn blogyna qala basshysy gýbernatorǵa jobany qoldaýdy usynyp, júgingen ǵalamtor qoldanýshylarynyń birine bergen jaýabynda jazdy.
Ǵalamtordy paıdalanýshy óz jazbasyna qosa Peterbor kósheleriniń birin Vıktor Tsoıdyń esimine aýystyrýdy usynýshy belsendiler týraly jarııalaǵan qalalyq BAQ materıalyna siltemeni bergen. «Ázirge mýzykanttyń 50 jyldyǵyna oraı qala ortalyǵynda fotokórme uıymdastyrýmen aınalysyp jatyrmyz», - dep atap ótti qala basshysy.
Eske sala keteıik, Vıktor Tsoı 1981 jyly 19 jasynda Keńes dáýirindegi eń tanymal rok-mýzyka toby - «Kınony» qurdy. Ómiriniń sońyna deıin ol toptyń kóshbasshysy, barlyq mátinder men áýenderiniń avtory boldy. Ujym nebári toǵyz jyl jumys istep, osy ýaqyt aralyǵynda júzden astam án shyǵaryp, birneshe án jınaqtary men kontserttik jazbalar jasady. Tsoı qaza tapqannan keıin «Kıno» toby lezde tarap ketti.
