Peter Madıar Majarstannyń jańa premer-mınıstri boldy
ASTANA. KAZINFORM - Peter Madıar Vengrııanyń premer-mınıstri qyzmetine resmı túrde kiristi. Onyń kandıdatýrasyn parlament depýtattary qoldady, dep habarlaıdy BBC.
Daýys berý kezinde ony 140 depýtat qoldady. 54 parlamentarıı qarsy shyqsa, bir depýtat qalys qaldy.
Ant berý rásimi el parlamentinde ótti. Bul — «Tısa» partııasynyń parlament saılaýyndaǵy senimdi jeńisinen keıingi alǵashqy saıası qadamdardyń biri.
Jańa partııa saılaýda 199 mandattyń 141-in ıelendi. «Tısa» partııasy nebári eki jyl buryn qurylǵan.
Osylaısha Majarstanda Vıktor Orban basqarǵan 16 jyldyq saıası kezeń aıaqtaldy.
Qyzmetine kiriskennen keıin Peter Madıar:
-Men Vengrııany bılemeımin, elime qyzmet etemin, — dedi.
Ol premer-mınıstr qyzmetinde Vıktor Orbannyń ornyn basty.
Orban osy ýaqytqa deıin «Fıdes — Vengrııa azamattyq odaǵy» partııasymen birge eldi 16 jyl basqarǵan edi.
Osyǵan deıin Majarstanda bılik aýysýy múmkin ekeni týraly jazdyq.
