Petarda jarylýynan zardap shekken 3 almatylyq aýrýhanada jatyr
ALMATY. QazAqparat - Pırotehnıkalyq ónimderden zardap shekken almatylyqtardyń jaǵdaıy týraly dárigerler aıtyp berdi, dep habarlaıdy QazAqparat tilshisi.
Dárigerlerdiń aıtýynsha, almatylyqtar meıramdy toılaǵanda qaýipsizdik sharalaryna basa mán bere bastaǵan. Bul týraly statıstıka derekteri kórsetip otyr.
Qalalyq Densaýlyq saqtaý basqarmasy basshysynyń orynbasary Nurjan Isabekovtyń aıtýynsha, bıyl jańa jyl túninde dáriger shaqyrýshylardyń sany azaıǵan.
Eger 2016-2017 jyldary 37-38 adam dáriger shaqyrsa, bıyl 30 jeltoqsan men 2 qańtar aralyǵynda 24 adam dárigerlerdiń kómegine júgingen.
24 adamnyń ishinde 3 adam aýrýhanaǵa jatqyzyldy.
«Onyń ishinde kóz almasy 3-4 dárejeli kontýzııa alǵan bir eresek adam Ortalyq klınıkalyq aýrýhanaǵa jatqyzyldy. Sonymen qatar, bir bala -kóziniń nurly qabyǵynyń kúıigimen, ekinshisi qolyn kúıik shalyp Shuǵyl medıtsınalyq járdem kórsetý ortalyǵyna tústi.
Qalǵan jeńil dárejedegi kúıik shalǵan nemese basqa da jaraqat alǵan 21 adam úıine jiberildi», - dedi Densaýlyq saqtaý basqarmasy basshysynyń orynbasary Nurjan Isabekov.
Mamannyń aıtýynsha, ótken jyldary petardalardyń jarylýynan zardap shekken adamdardyń jaraqaty tereńirek bolatyn. Kópshiliginiń dene músheleri julynyp, kóz almasy tereń zardap shekken bolatyn.
Sonymen qatar, Jańa jyl túninde ishimdikten nemese astan ýlanǵan derekter tirkelmegen.
