Peskov Pýtınniń Qazaqstanǵa sapary týraly: Reseı mańyzdy kelisimderge qol jetkizýdi kútedi
ASTANA. KAZINFORM – Reseı Federatsııasy Prezıdentiniń baspasóz hatshysy Dmıtrıı Peskov Reseı tarapy Vladımır Pýtınniń Qazaqstanǵa memlekettik saparyna úlken úmit artatynyn málimdedi.
D. Peskovtyń aıtýynsha, eki el arasynda kópjaqty yntymaqtastyq qalyptasqan jáne sapar barysynda buǵan deıin qol jetkizilgen birqatar kelisimdi bekitý josparlanyp otyr.
– Biz bul saparǵa úlken úmit artamyz. Eki el arasynda túrli salada jan-jaqty yntymaqtastyq pen baılanys ornaǵan. Búgin de birqatar kelisim resmı túrde bekitiledi. Qandaı qujattarǵa qol qoıylatynyn aldyn ala aıtýdyń qajeti joq. Qazir qujattarǵa qol qoıý jáne olarmen almasý rásimi ótedi. Onyń ishinde memleket basshylary deńgeıindegi saıası ári tujyrymdamalyq qujattar da, mınıstrlikter, vedomstvolar jáne kompanııalar deńgeıindegi salalyq kelisimder de bolady, – dedi Dmıtrıı Peskov Astanadaǵy Táýelsizdik saraıynyń kýlýarynda.
Sonymen birge, RF prezıdentiniń baspasóz hatshysy Reseı úshin Qazaqstanmen qarym-qatynastyń erekshe mańyzǵa ıe ekenin atap ótti.
– Munyń bári biz úshin óte mańyzdy. Qazaqstan – bizdiń odaqtasymyz ári strategııalyq seriktesimiz. Sondyqtan bul saparǵa aıryqsha mán berip otyrmyz, – dedi ol.
Aıta keteıik, 27-29 mamyr kúnderi Reseı Federatsııasy Prezıdenti Vladımır Pýtınniń Qazaqstanǵa memlekettik sapary ótedi. Memleketter basshylary bul saparda Qazaqstan men Reseı arasyndaǵy jan-jaqty strategııalyq seriktestiktiń jáne odaqtastyq qatynastardyń qazirgi jaı-kúıin, sondaı-aq ony nyǵaıtý perspektıvasyn talqylaıdy.
Búgin Memleket basshysy Qasym-Jomart Toqaev Reseı Prezıdenti Vladımır Pýtındi Táýelsizdik saraıynda resmı qarsy aldy.
Buǵan deıin Kazinform tilshisi eki el arasyndaǵy yntymaqtastyqtyń qazirgi damý úrdisteri men aldaǵy perspektıvasyna sholý jasaǵan edi.
