Peshtiń murjasyn aýystyrǵan oraldyq turǵyn adam ólimi úshin sotta jaýap berdi
ORAL. QazAqparat - Oralda pesh qubyrynyń aqaýy saldarynan bir adam qaza bolyp, úsh adam zardap shekti. Sot aldynda peshtiń murjasyn durys aýystyrmaǵan páterdiń burynǵy ıesi jaýap berdi, dep habarlaıdy QazAqparat tilshisi.
Oral qalalyq sotynan túsken málimetke qaraǵanda, sotqa deıingi tergep-tekserý organdary Dambovyı týpık kóshesi 3/1 úıindegi 10-páterdiń burynǵy ıesi S.Temirǵalıevke qurylys jumystaryn júrgizgen kezde qaýipsizdik qaǵıdalaryn buzdy degen aıyp taqqan.
S.Temirǵalıev 2011 jyldyń qazan-qarasha aılarynda eki jumysshyny jaldap, osy úıdiń birinshi qabatyndaǵy 7-páterdiń tútin shyǵatyn murjasynyń óziniń úıi arqyly ótetin jerin demontajdaǵan. Ornyna murja retinde dıametri 110 mm temir qubyr ornatqan. Ol jóninde eshteńe aıtpaı, páterdi Qubashevtarǵa 2015 jyly 3 tamyzda satyp jibergen. Sonyń saldarynan 2017 jyly 1 sáýirde páter turǵyny Ch.Temirbolat gazdan ýlanyp kóz jumdy. Al onyń anasy N.Qubasheva jáne 7-páter turǵyndary J.Qablanov pen G.Qablanovalar aýyr jaǵdaıda aýrýhanaǵa jetkizilgen.
Osylaısha, S.Temirǵalıevtiń áreketteri QR QK 104-baby 1-bóligi (abaısyzda qazaǵa ushyratý) jáne 114-baby 4-bóligine (abaısyzda eki adamnyń densaýlyǵyna aýyr dárejede zııan keltirý) sáıkes qaralǵan.
Alaıda, aıyptalýshy sot talqysynda peshtiń kirpishpen jasalǵan qubyryn temirmen aýystyrý jumystaryn júrgizgen jumysshylarǵa kásibı mamandar retinde sengenin málimdedi. Oǵan qosa, bul jumysty tómengi páter turǵyndarynyń birneshe ret aıtqan ótinishterinen soń jasaǵan, ıaǵnı olar pesh qubyrynyń aýystyrylǵanyn bilgen. Bul murjanyń óz úıin jylytýǵa qatysy joq. Onyń páterindegi gazben jylytylatyn pesh qubyry basqa bólmede ornalasqan. Peshtiń qubyryn aýystyrǵan soń ózi de otbasymen osy páterde tórt jyldan astam ýaqyt boıy turǵan. Murjanyń ózgertilýi qaıǵyly oqıǵaǵa soqtyrady dep oılamaǵan. Sonymen qatar S.Temirǵalıevtiń tómengi qabattaǵy peshtiń ottyǵy durys jasamady degen ýájin de joqqa shyǵaratyn mán-jaılar sot tergeýinde anyqtalmady.
«QR Qylmystyq is júrgizý kodeksiniń 393-babyna sáıkes aıyptaý úkimin boljamdarǵa negizdeýge bolmaıdy jáne ol sottalýshynyń qylmystyq quqyqbuzýshylyq jasaýǵa kináliligi zerttelgen dáleldemeleriniń jıyntyǵymen rastalǵan jaǵdaıda ǵana shyǵarylady. Sondyqtan S.Temirǵalıevke qatysty aqtaý úkimi shyǵaryldy», - dep habarlady Oral qalalyq sotynan.
Aıta keteıik, Salamat Temirǵalıev budan buryn osy oqıǵa boıynsha aıypty dep tanylyp, úsh jylǵa bas bostandyǵynan aıyrylǵan bolatyn. Keıin is Joǵarǵy sotta qaralyp, buzylǵan edi.
