Peshke maı tógilgen: Aqmola oblysynda temirjol vokzalynan órt shyqty
KÓKShETAÝ. QazAqparat – Qutqarýshylar Makınsk qalasynyń temirjol býfetinde bolǵan órttiń aldyn ala sebebi retinde peshke tógilgen maıdy aıtty, dep habarlaıdy QazAqparat tilshisi.
Aqmola oblysy TJD baspasóz qyzmetiniń málimetinshe, 3 tamyz kúni saǵat 01:33-te órt sóndirýshilerge Makınsk qalasynda temirjol vokzaly ǵımaratynyń janyp jatqany týraly telefon habarlamasy kelip túsken.
«Úsh mınýttan keıin órt sóndirýshiler TJ ornyna keldi. Barlaý júrgizý kezinde «Makınka» stantsııasynyń temirjol vokzalynyń ashanasy órtenip, jalyn shatyrǵa qaraı tarap bara jatqany anyqtaldy. Órttiń jalpy aýdany 60 sharshy metrdi qurady. Bir saǵat ishinde órt oqshaýlandy jáne taǵy bir saǵattan keıin tolyǵymen sóndirildi»,- dep atap ótti vedomstvo.
Órt sóndirýshilerdiń jedel áreketteriniń arqasynda temirjol vokzalynyń ǵımaraty qutqaryldy.
Qutqarýshylardyń aıtýynsha, qaza bolǵandar men zardap shekkender joq, temirjol qatynasy da buzylǵan joq.
«Órttiń aldyn ala sebebi – peshke tógilgen maı. Býfet qyzmetkerleri tamaq daıyndap jatqanda abaısyzda órt shyqqan. Alaıda, bul - tek aldyn ala boljam ǵana. Órt ornyna órtke qarsy zerthanasy bardy, ol keıinirek órttiń naqty sebebin anyqtaıdy», - dep tolyqtyrdy departament.
