Pesh ústinde qalǵan tamaq boıjetkenniń ólimine ákele jazdady
ASTANA. QazAqparat - Óskemen qalasynda ornalasqan 5518-áskerı bólimniń sarbazdary órt shyqqan úıden es-tússiz jatqan boıjetkendi alyp shyqty, dep habarlaıdy QazAqparat tilshisi.
«Shyǵys» óńirlik qolbasshylyǵy baspasóz qyzmetiniń basshysy Baǵdat Amangeldiniń aıtýynsha, gvardııashylar ýaqytynda jetpegende oqıǵa qaıǵyly jaǵdaımen aıaqtalýy ábden múmkin edi.
Oqıǵa jeksenbi kúni keshke bolǵan. Óskemendegi Komsomol kóshesinde kezekshilik atqaryp júrgen 5518-áskerı bólimniń narıadyna №23 úıdiń birinshi qabatyndaǵy páterlerdiń biri órtenip jatqany habarlanǵan. Sarbazdar patrýldik toptyń bastyǵyna bul jaıly habar berip, atalǵan mekenjaıǵa umtylady.
«Oqıǵa ornyna jetken gvardııashylar terezeni buzyp kirip, es-tússiz jatqan qyzdy syrtqa alyp shyqty. Páterde basqa eshkim bolmaǵan. Boıjetkendi syrtqa alyp shyqqannan keıin alǵashqy medıtsınalyq kómek kórsetken», - delingen «Shyǵys» óńirlik qolbasshylyǵynyń habarlamasynda.
Jalyndy áskerı qyzmetshiler órt sóndirýshiler kelgenshe óshirgen. Anyqtalǵandaı, tilsiz jaýdyń lap ete túsýine qosýly turǵan elektr plıtasynyń ústinde qalyp qoıǵan tamaq sebep bolyp otyr. Oqıǵa ornyna jedel-tergeý toby kelip, istiń mán-jaıyn anyqtaýǵa kirisken.
Qatardaǵy jaýyngerler Álı Saǵatbek, Bekbolat Itekbaev pen Aıtýar Hamıtuly «Qoǵamdyq tártipti qorǵaǵany úshin» tósbelgisine usynyldy.
