Pesh murjasyn mamandanǵan uıymdar jóndeýi kerek – Roman Sklıar

NUR-SULTAN. QazAqparat – QR Premer-Mınıstriniń birinshi orynbasary Roman Sklıar Májilis depýtattarynyń saýalyna joldaǵan jaýabynda jer úıde jıi kezdesetin órttiń negizgi sebebin atady, dep habarlaıdy QazAqparat tilshisi.

«Iis tııýge baılanysty, sonyń ishinde balalar arasynda qaıǵyly jaǵdaılardyń jıilep ketýiniń sebebi gazdy turmysta durys paıdalanbaýdan bolady. Jeldetý kanaldary men murja júıesine qoıylatyn talaptarǵa turǵyndardyń kóbi nemquraıdy qaraıdy» dep jazdy Roman Sklıar depýtattyq saýalǵa joldaǵan jaýabynda.

Vıtse-premer «Gaz jáne gazben jabdyqtaý týraly» QR Zańynyń 7-baby boıynsha gazdy turmysta paıdalanýdyń qaýipsizdigin jergilikti atqarýshy organdar baqylaıtynyn aıtady.

«Búgingi tańda óńirlerde QR Ulttyq ekonomıka mınıstriniń 2015 jylǵy 20 naýryzdaǵy №241 buıryǵymen bekitilgen Turǵyn úı ınspektsııasy týraly úlgilik erejege sáıkes gazben jabdyqtaý júıeleriniń obektilerin qaýipsiz paıdalaný talaptaryn saqtaýyna memlekettik baqylaýdy jáne qadaǵalaýdy júzege asyratyn turǵyn úı ınspektsııalary quryldy. Sonymen birge gazben jabdyqtaý obektilerin qaýipsiz paıdalaný talaptarynyń saqtalýyn qadaǵalaý maqsatynda turǵyn úı ınspektsııalary Ákimshilik quqyq buzý týraly kodekstiń 729-babyna sáıkes ákimshilik isterdi qaraıdy», - delingen Roman Sklıardyń jaýabynda.

Onyń aıtýynsha, gaz tutynýshy júıelerge kórsetiletin qyzmettiń ishine murja men jeldetý kanaldarynyń, aralyq qubyrlardyń aqaýsyz jumys isteýin, peshke aýanyń jetkilikti kirýin tekserý sharalary da kiredi.

Biraq tútin júretin jol men jeldetý kanaldaryn tazalaý bul qyzmettiń ishine kirmeıdi.

«Úı ishindegi gaz qondyrǵysyn jóndeý jumystaryn jáne tıptik kelisimshartta kózdelmegen jumysty tapsyrys berýshiniń ótinimi boıynsha mamandandyrylǵan uıym aqyly negizde atqarady», - dep túsindirgen Úkimet basshysynyń birinshi orynbasary.

Onyń aıtýynsha, gaz qondyrǵylaryna sapasyz qyzmet kórsetken uıymdar jazalanýy múmkin.